H y t t e h u s e t

Fretex og heimedag

2012-01-10T14:23:00.002+01:00

Det er lenge sidan eg har vore på fretex no, faktisk over ein månad, he he. Ja, eg stikk titt og ofte innom, men no som eg er i full jobb blir turane sjeldnare. Men i går tok eg ein spontan avstikkar på veg heim, og det angrar eg ikkje på.

På Fretex kunne dei fortelje at det hadde kome inn så mykje fint no etter jul, at dei knapt fekk varene ut i butikken. Og i butikken venta desse herlege skattane på meg...

Vidunderlege kakeboksar (med klistrelapp om smørkaker frå 1983, he he), eit sinkhus (er det eit Walther-hus eller ikkje?), skjønn solid bamsekakeform og herleg blå Staffordshirekopp.

Eg er sjuk i dag, og dermed har eg ro i heimen til å nyte ein kopp nykverna kaffi med god avis til. Det er ikkje ofte det er stille her, men akkurat no kjennest det godt.

Kanskje eg heller skulle hatt melk med honning i? Håpar du er frisk.

Gode dagen!

Midt i julestria...

2011-12-10T21:20:00.002+01:00

fór me til hyttehuset forrige helg. Det var klart for ei bursdagsfeiring, og me ville vekk litt frå kvardagen.

Det er noko med lyset her, det er mykje lysare i hyttehuset enn i heimen, og akkurat i desse mørke tider kjennest det ekstra godt med det lille ekstra lyset. Hyttekjøkkenet er godt gjennomlyst, og eg synest det er fint, eg. Det gule sommarteppet måtte skiftast ut med eit anna for å fjerne litt av sommarkjensla akkurat no. Men huset framstår ikkje akkurat i juleprakt, he he.

Vel, litt jul blei med heimefrå. Nemleg desse nydelege kremmarhusa Borghild har sydd og som eg fall sånn for. Pastelljul i spisekroken vår.

Og så glimta sola plutseleg til og ga stova ein glød eg berre måtte fange med kameraet.

Postkontoret til jentene, kor dei leikar heftig kvar gong me er her (dei skriv brev og sendar rundt om i huset) blei denne helga endra til juleverkstad.

Minstemor i aksjon.

Julerose var resten av julepynten, og ho var ei gåve til bursdagsbarnet som ikkje var meg eller ungane. Planten er superkjekk ettersom han kan plantast ut seinare og blomstra tidleg tidleg på året.

Ja, og stjerna, sjølvsagt. Denne stjerna er frå oldemora mi, og ho har no fått fast plass i hyttehuset. Her hang ho som heime hos oldemor, så her skal ho få skinne og minne så fint.

Men no er me heime igjen, klare for dei siste innspurtsvekene før jula.
Måtte dei bli gode for einkvar...

Ein kjøkkenvegg med herleg kopp

2011-08-01T23:47:00.001+02:00

Hylla på kjøkkenet har fått ein ny kopp som stod på Fretex og venta på meg i forrige veke. Eg har nemleg gode kjensler for emaljekoppar sidan me berre hadde slike på ei hytte i barndommen som eg har så gode minne frå. Den gongen var koppane raude og brune, men dei hadde nett slike blomar som denne blå her. Derfor hoppa hjartet mitt over eit slag då eg såg koppen stå og vente på meg. Eg leita etter fleire, men nei.

Desse emaljekoppane er faste heimelaga-saft-koppar, og det er kjekt med ein ny. Dei andre er frå IB Laursen.

Dette er eine veggen på kjøkkenet, den som går ut mot gangen. Døra har tavlemaling, men berre eitt strøk, så ho er enno ikkje tatt i bruk sjølv om dette eine strøket kom på i fjor...

Me har hatt mange fine veker i hyttehuset, denne sommaren med stor vekt på hage. Drenering og planering tek tid og krefter. Og så pausar me litt med kos med barna, turar (dei to eldste jentene drog med faren sin til Preikestolen førre veke medan eg tok minstejenta på ein mindre krevjande tur), bibliotek (på dei grå dagane), bading etc. (Og så meklar me når ungane går i totlevase saman (les:kranglar). Det er ikkje til å stikke under ein stol at slikt skjer, he he.) Innimellom drar me heim for å klippe plen og ta turar innom Fretex etc. Når hytta ikkje er så langt heimefrå, går slikt an.

Og på ein heimetur var eg inniom Ikea og såg ei lampe eg berre må ha når nye pengar kjem inn på kontoen. Ho er enno ikkje komen på websidene, men eg trur ikkje eg vil vere åleine om å falle for henne. Eg drøymer om å lage ein tøff arbeidsplass her heime også, og der skal ho i så fall få vere. Akk ja.

Nye dagar kjem, me er litt her og der. Så får me sjå.

Gode kvelden til dykk!

Gjesterommet

2011-07-30T23:12:00.002+02:00

Dagane går så smått vidare. Det må dei. Og det trur eg er godt for alle. Dei grufulle hendingane vil ligge i minna alltid, men også rosetoget, minnekonserten i dag (Himmel kor fantastisk han var og kor imponert eg er over kva folk får til!), korleis Norge mobiliserer demokrati og samhald i ekstreme situasjonar. Eg blir rørt når eg les internasjonal media kommentere dette, eg blir stolt og eg fortel ungane mine at dei er svinheldige som får leve i verdas beste land. Takk Norge!

Kvardagane som har gått har mellom anna resultert i eit nokså ferdig gjesterom eller arbeidsrom for mor sjølv i hyttehuset. Her kan eg sitje og gjere førebuingar og etterarbeid til lærargjerninga mi. Kjekt med trivelege omgivnader når slikt arbeid blir for trøyttande. Rommet er lite, men kom inn så skal du få sjå...

Me har tapetsert ein vegg med eit tapet som eg synest er herleg nostalgisk og som er kjøpt på Retrovilla.

Når me får gjester (mellom anna ei herleg tante som brukar mykje tid med oss og ungane våre), så kan dei liggje her. Og dei ligg heretter på ei palleseng. Riktignok skal det kome hjul under pallane, dei er innkjøpte, men ikkje påskrudde. Eg var innom Ikea for å få fatt i, men dei hadde slutta å selgje slike no...? Heldigvis fann eg hjul på Clas Olsson.

Det strikka sengeteppet fann eg på Fretex, og fargane passa perfekt til meg. Her er det gjenbruk av det meste. Nattbordet har vore ein knall rød krakk frå ei bestemor, skrivebordet er frå svigermor, rya er frå Fretex, stolen frå Finn...

Her skal eg sitje ein del, tenkjer eg.

I den tankefulle veka har eg fått sydd litt også. Denne posen har kome til...

Med ein viss fare for overdriving av det småmønstra...,

eg diggar det!

Medan eg sat med symaskin og radio prøvde eg meg også på mi første liftgardin.

Etterkvart skal det inn litt puter og nokre kontorting.

Slik går dagane framover. Det er godt å gjere noko med hendene når ein er litt utafor.

Håper det går godt med dykk alle.

Ein mandag etter ein fredag me aldri vil gløyme

2011-07-26T00:21:00.002+02:00

Etter stans i kropp og sinn i fleire dagar, vaknar ein til ein kvardag som er, men som ikkje er likevel. Han er nummen og apatisk, men sterk og medviten. Me gir oss ikkje! Med "bøygde Rygg, med svære Saar" reiser me oss, reiser Norge seg.

I dag har det vore stille eitt minutt i Norge og Norden. Det er rart kva ein knyttar slike augneblinkar til. Eg laga sitronlemonade og stoppa opp. På radioen høyrde eg at bilar langs vegane hadde stoppa, at butikkansette tok kundane med utanfor for å vere stille saman, at skjermar gjekk i svart.

Fellesskap!

Og når radioen er med meg, blir dagens prosjekt prega av det ufattelege som har skjedd. Når eg ser desse bileta mine, høyrer eg radiostemmar og føler sorga. Men livet går vidare. Ein av AUF-ungdommane syntest det var tøft å komme på Gardermoen og sjå at ting gjekk føre seg på normalt vis. Det forstår eg så godt. Eg høyrer W. H. Audens "Stop all the clocks" i bakgrunnen. Og eg føler så med.

Safta eg har laga i dag ber minne i seg.

Etter sitronlemonaden blei det ripssaft. Det høyrer sommaren til.

Mykje sukker!

Mykje saft.

Mykje lys og mykje varme!

Eg føler med!

Vedovn i juli

2011-07-06T09:43:00.001+02:00

Det er kanskje heilt feil årstid no å fokusere på varmesenteret i heim og hytte, men sidan sommaren til no har vore så kald, så gjer eg det likevel. Vedbaljen er likevel tom for ved, og slik må det jo vere i juli.

Vel, eg må jo konstatere at det nokre kveldar hadde vore herleg med fyr i ovnen.

Sist helg sette eg opp denne setninga som eg tykkjer er så fin. Ho er henta frå eit kjent dikt av ein kjent og kjær norsk avdød forfattar. Klarer du oppgåva?

Varmekroken vår fekk litt meir innhald med denne setninga. Og minstemor på snart tre synest det er kjekt å peike ut sin bokstav her. Kanskje ho skal få øve seg på å plukke ut fleire av sine.

Og her er bonden sitt moderne gjøkur (som han har døypt innstallasjonen).

Fuglen reiv eg av ei slik lyslampe ein kan kjøpe på Ikea og sette oppå taket på fuglehuset frå Nille.

Eg bytta ut vedbaljen med ein krakk no for sommaren. Det passar betre, sjølv om temperaturane ikkje overbeviser meg, he he.

PS! I går bestilte eg tur til Berlin for meg og bonden. Norwegian hadde tilbod som sa 199 kroner for ein veg, og dermed heiv eg meg over. Ungane blir hos mormor. Det skal bli herleg. No må eg berre setje meg inn i Berlin. Og eg er takksam for innspel også på det.

Gode dagar framleis.

Eit anna hytterom

2011-07-04T18:46:00.004+02:00

No begynner soverommet vårt å bli ferdig i hyttehuset. Eg kan riktignok ikkje vise alle fire veggane, for på den eine står uferdige maleprosjekt, men noko kan eg vel etterkvart vise fram.

Og då blir det denne veggen her. Her har eg limt opp ein Ferm Living wallsticker, og det gjorde susen her inne. Det heile blei litt stramare, og ikkje fullt så sukkersøtt som det kan bli med ein pudderrosa skjenk/kommode, he he. Eg er ikkje utprega romantisk av meg, men soverommet kan godt vere i nokre mykare tonar enn resten. Dermed har eg tillate meg fargen rosa her.

De veit, mennene er ikkje alltid så overbeviste om at sarte rosafargar er dei rette i ein heim, men bonden her syntest faktisk det heile blei greitt. Og det er jo ikkje verst.

Men så lurer eg litt på om eg ikkje skal piffe skjenken opp med litt tapet. Eg er usikker, så om nokon meiner noko her, er eg takksam for innspel. Eg har dette tapetet frå Liebe i København liggjande:

Skal eg tapetsere skuffene?

Eg synest veggklistremerket skaper liv på rommet. Den lille fuglen som sit oppå garderobeskapet kikkar bort på dei andre og vil gjerne vere med. Ungane synest det er kjekt å dikte historier om desse fuglane.

Nedst til venstre heng skittetøyet vårt. Slikt må ein ha i hyttehuset, veit de.

Ja ja, dette var litt frå soverommet vårt.

Uups, no kom eg på at det var her inne eg hadde sett dokkekjolen jentene etterlyste. Han har søkt ly under skjenken, he he.

Så får me vente vidare på det fine veret. Gode dagar til dykk!

Terrassebeis - juhu

2011-06-30T14:25:00.001+02:00

Etter mange år med laber interesse for vedlikehald av terassebord hos oss, har me no kasta oss ut i det og fått beisa. Det einaste me har gjort i fem år er å vaske vekk grønske. Og derfor er me ekstra glad for det supre resultatet.

Fargen er den lysaste me fann, naturkvit (red: etter nærmare ettersyn heiter fargen gråhvit), og me blei nesten fraråda denne fargen av malarforretninga då dei hadde hatt så mange som hadde kome tilbake fordi det heile blei for lyst. Me er ikkje der, tvert om er me strålande fornøgde. Lyse terrassebord passar utmerka til det mørke huset vårt.

Fargen er nesten som bleikna teak når ein samanliknar.

No ventar me berre på det fine veret som tillet oss å bu ute. Håpar det kjem snart. (Ute smilar faktisk sola no, så kanskje eg skal ta meg ein god kaffi nettopp ute? Eg er så glad i dag også, for nokre herlege Fretexkupp har funne vegen hit.

Gode dagar!

Hylleblomstsaft

2011-06-19T10:38:00.006+02:00

No er det tid for innhausting av hylleblomstrar. Iallefall her. I går var hylleblomstrar nokre av dei blomstrane eg plukka inn. Rett utanfor huset her står nemleg ein stor svarthyll som ingen ser ut til å bry seg om. Det passar meg veldig godt, for då nappar eg med meg ei korg med blomstrar for å lage saft.

Hylleblomstsaft er noko som høyrer sommaren til, synest eg. Ein skikkeleg sommardrikk.

Og så er det verdas enklaste saft å lage. Du treng sukker, sitronsyre, hylleblomstrar og sitron. Så skal du riste blomstrane litt for å få vekk eventuelle smådyr på dei, klippe av det meste av stilken (om du gidd), dele opp sitronane i skiver...

... deretter drysse over sitronsyre og sukker (i store mengder)...

så skal du helle over kokande vatn og røre litt rundt. Eg brukar vatnkokaren.

Ja, så er det rett og slet berre å setje det heile kaldt i tre dagar. Etter det silar du og heller konsentratet over på reine og lekre flasker. Kjekk sommargåve og kjekt å ta fram på bordet utover sommaren.

(Ja, her ser det også beina til minstejenta på biletet ovenfor her, ho følgjer ivrig med på det som skjer.)

Oppskrifta eg brukar er slik:

40-50 blomsterskjermar

2 kg sukker

2 pk sitronsyre (50 g)

2 liter vatn

3 sitronar

No skal eg berre røre litt i gryta nokre dagar så er safta ferdig. Prøv du også, vel!

Ha ein god søndag!

Lampar på plass

2011-06-18T16:24:00.001+02:00

Her kjem eit ustyla bilete frå kjøkkenet vårt. Her heng strykebrettet på skapet, sokkar ligg på golvet og ein madrass me plar ha ute ligg i fronten. Vinduskarmen er ikkje rydda. Men gjer det noko?

Ikkje i det heile. Slik har me det.
Kjøkkenet er framleis ikkje ferdig, plater rundt komfyren skal på veggen, komfyren skal heisast opp litt pluss me skal skru i handtak på nokre skapdører. Forrige helg kom me likevel eitt skritt nærmare når lampane over benken kom opp.

Dei er frå Clas Olsson og passar godt sidan dei ikkje tek noko av lyset frå vindauget.

Om nokre veker skal eg stå på dette kjøkkenet med rips i mengder og koke saft. Det gler eg meg til.

No derimot, skal eg ut og plukke blomster.

Framdrift på fleire plan

2011-06-14T18:48:00.001+02:00

Denne helga tok eg med meg symaskina og alle lappane eg hadde gjort klare for eit lenge planlagt lappeteppe til hyttehuset. Det skulle vere ei skikkeleg kosehelg.

Og her har eg den gode kjøkkenbenken som klippe- og strykebord,

og spisebordet til sybord.

Lappane blei lagt utover golvet med god assistanse frå dei to eldste jentene. Dei skulle passe på at like lapper kom i passande avstand frå kvarandre. Og dei gjekk inn i jobben med stor iver og interesse.

Her er det ferdige teppet klart ute på benken.

Minstejenta betraktar Formfulle Frida som har teke plass på benken. Ho er sydd for lenge sidan.

Eg blei kjempenøgd med mitt første lappeteppe. Det er ganske stort og i favorittfargane mine.

Og baksida er eit vatert sengeteppe med silke under. Dermed blei lappeteppet tungt og lunt.

Jepp, det var noko av helgas aktivitet hos meg. Av andre prosjekt så har eg spadd på meg eit vondt kne i iveren etter å flytte jordmasse for å jamne ut noko terreng slik at me får ein fin sitjeplass ute. Jorda ar bearbeida, plenfrø er sådde i. Her er området slik me forlot det. Forhåpentligvis blir det grønare om nokre veker.

På nivået nedanfor, skal eg ha ein hageverkstad med arbeidsbenk, krukker og ein godstol.

Så får de nyte juni, sjølv om han ikkje gir mykje varme her hos oss!

Litt putl frå Hyttehuset

2011-06-08T20:55:00.002+02:00

Her er skapa me fann på Finn i mørkna furu. Blei dei ikkje fine i stova i hyttehuset? Isvann er fargen, og den har me fleire stader. Innanføre her er spisestova vår, og til venstre der igjen er kjøkkenet me har opna opp. Oppå skapet her ligg den heimelakkerte lampa me skal ha i taket her, funnen i bruktbutikk i København.

Eg blir alltid usikker på kva eg skal ha i nye skap, eg får jo plutseleg ein god del meir plass. Ja, ikkje det at eg er redd for at dei ikkje skal få innhald, men kva for type innhald skal vere i sentrale glasskap i stova? Lettilgjengelege lys må det iallefall vere. Her i ei gåvepapirtapetsert eske.

Og så knipsa eg nokre bilete av stova igjen. Eg ventar på å få malt dette fretexbordet kvitt. I mellomtida har eg berre lagt under noko stoff. Det hjelpar på. Eg er ikkje heilt gira på treverk eg, og skal det vere det må det vere lyst.

Her er til sist sofakroken vår kor me glanar på tv, kvilar og spis snop i helgene, he he.

Det var ein liten kikk innom for denne gongen.
God veke!

Nestensommar

2011-06-06T19:46:00.000+02:00

Så var denne langhelga over. Nydeleg ver og landlege omgivnader er balsam for sjel og kropp. Bibliotektur kjennest nesten som luksus for tida, men slikt blei det også tid til. Etter dreneringsarbeidet er det nok å gjere utanfor hyttehuset. Me drog inn på jord og grus, men slikt høyrer vel til, tenkjer eg. Bilete frå slike jordhaugar er berre interessante for oss som står midt i dei og deltek i kvart lass som blir flytta. Derfor utelet eg dei her.

Det litt meir lystige er bilete av sol og reinare forhold. Eg laga meg eit lite utekjøkken av ei gammal bokhylle måla i pastellgrå farge. Dermed kunne eg stå ute og lage salaten.

Og veit de, eg har vore på kurs i tomatskjering. Ikkje visste eg at tomatene helst skal skjerast midt på, og ikkje gjennom stilkeauget.

På den måten held inmaten seg fastare til tomatkroppen (ja, eg er ikkje kokk og veit dei rette uttrykka for diverse matdelar, he he). Og det stemmer. Eg har prøvd utallige gonger no, og teorien held. Berre prøv.

Så var det klart for måltidet, he he. Grilla pølser. Når pappa er på jobb, gjer mamma det enkelt i solsteiken.

Det blei bading i basseng, lesing i godstol (Sommeren uten menn av Siri Hustvedt), graving i jord, såing av plen, oppsetjing av gjerde etc. Men alt i slike omgivnader at det heile berre følast som ferie. Gjett om eg gler meg til den endelege og etterlengta SOMMARFERIEN?

Gravemaskina på plass!

2011-05-24T17:31:00.002+02:00

Lenge sidan siste innlegg her, men det heile går i turbo, så det blir lite tid. Mange tankar i hovudet, nokre blir sett ut i livet medan andre er i tankesfæren. Der får dei sikkert bli ei stund. Dei som førebels er sett ut i livet har enda i eitt større prosjekt, nemleg dreneringsarbeid. I dag kom gravemaskina, og slik er hagestatusen utanfor hyttehuset i dag:

Det blir altså drenering også her. Me drenerte rundt heimehuset for fem år sidan og laga hage etterpå, og no er det sanneleg på-an på ny. Tomta her er ganske skrå/hellande, så masse skal ikkje køyrast vekk, men brukast på ny til å jamne ut terreng og på sikt gi nye hagekrokar. Gjenbruk, he he!

Ser de dei flotte steinane som dukka opp her? Dei skal ikkje gøymast under jorda iallefall, dei skal fram! Eg gler meg, sjølv om det tek tid. Me har inga hast!

Gult frå barnehender

2011-04-27T00:14:00.000+02:00

Her er kva jentene mine i dag sprudlande har kome inn til mamma med, alle uavhengige av kvarandre. (Kanskje toåringen har blitt litt inspirert av dei andre.)

Løvetann eller hesteblomst saman med gåselabb i vase er ikkje akkurat suksessoppskrift, men det er heidundrande vakkert i augneblinken. Og dei tre små smørblomstane er så søte.

Med dette på bordet blei dagen i dag også gul, om enn ikkje påskegul.

Barneplukka bukettar er ubetaleleg!

Påske2011

2011-04-25T19:18:00.002+02:00

Så er påsken for i år slutt. Og sjeldan har eg følt påsken har vart så lenge som i år. sannsynlegvis skuldast det det fine veret og alle mogleiheitene det gav. Det kjennest som ei evigheit sidan spisebordet vårt heime var lasta med stoff som skulle til hyttehuset.

Ikkje akkurat ei standard påskeoppakking, kan eg tenkje, men det er så mykje som skal med kvar gong me tek turen.

Og så var me på plass, og klare for den første påskefrokosten.

Der kom dei herlege eggevarmarane som Kaspara har laga naturlegvis på bordet. Flittig brukte heile påsken!

I hyttehuset legg me frå oss alt kav frå kvardagen, og nokre av oss tek fridomen heilt ut. Her er det radiolytting på bordet!

Soling, lesing, turgåing, leiking, klatring og vedstabling var mellom anna påskeaktiviteter.

Men det måtte også vaskast litt, og då var det godt med små hjelparar. Her hadde minstejenta fått seg bleiehatt. (Ikkje sjå på det uferdige taket, det er mykje arbeid igjen, men me tar det etterkvart.)

No er me klare for å ta fatt på kvardagar igjen. Og det er gjerne du óg?

God veke!

Vår og energi på plass!

2011-03-26T11:23:00.003+01:00

Denne fantastiske helga med sol gir energi i mengder. I går fekk eg meg ei syøkt der to pynteskjerf til barn blei produserte. Dei tynnslitte dynetrekka er ikkje alltid perfekte til puter og slikt, men ultimate for tynne sommarskjerf.

Eg har ein rosainspirert seksåring her, og ein snart treåring som skal ha akkurat det same. Dermed måtte det bli to skjerf.

Eg blir alltid så glad når eg får sydd litt, for det er så knapt med tid.

Og å få setje sin eigen merkelapp på er sjølvsagt stas for oss amatørar, he he.

No står det ei lita planteøkt foran meg. Eg har kjøpt meg nokre små stiklingar på Plantasjen og fekk på den måten henta inn litt tapt tid (desse frøa skal såast tidleg). Eg skal no ut og plante om det som forhåpentlegvis skal bli flotte blå hengepetuniaer til sommaren.

Og så blir det litt anna også, mellom anna pelargonia.

Seinare (snart) skal eg så kvite fylte valmuer, duftande erteblomar og nokre plukkeblomar, som me kallar det her. Frøa ligg klare, men sidan eg skal vekk nokre dagar, må eg vente. For frøa MÅ ha godt stell!

Eg berre elskar våren!

Verda rundt

2011-03-22T23:38:00.001+01:00

No tek det ikkje rare tida på ei verda-rundt-ferd. Det er slett ikkje snakk om 80 dagar iallefall.

Denne søte globusen låg i korga til ein fretexansatt og var på veg mot ei hylle då eg snappa han med meg. Fretexmannen berre gliste og sa at han var fin. I kassa understreka også ekspeditøren det same. Eg nikka nøgd tilbake.

Førebels står han i stova. Kanskje kjem han til å vandre rundt i heimen her som me vandrar rundt i verda? Ei form for vekselverknad kanskje? Eg trur i så fall at det er me som vandrar ut i verda som får mest igjen, he he. Uansett - eit kupp eg smilar av.

I gang med vårputer

2011-03-21T11:15:00.000+01:00

Tenk at me i helga kunne grille ute på altanen. Sola skein og me var ute og koste oss i fire timar. Både vaksne og ungar vaknar til liv når slikt skjer.

Eg fekk nemleg denne nydelege buketten frå dei nydelegaste ungane, og sjølv blei eg inspirert til å sy puter med vårkjensler.

Det blei to store puter på 65x65, og så har eg klippa opp kvadratiske lappar til fleire mindre puter på 50x50. Desse har eg tenkt å ha ute i hagemøblane våre når vår og sommar slår til for fullt. I mellomtida får dei opphald inne. Fargane er mine, kan eg vel seie. Eg elskar dei!

Men blomane frå barnehand elskar eg meir! Det er noko eige ved slike.

God veke!

Støtt Japan!

2011-03-18T10:02:00.000+01:00

Røde Kors Redd Barna

Mens eg ventar på våren

2011-03-11T17:29:00.002+01:00

får eg rett og slett leike vår inne. For meg betyr det laukplantar og fargar.

Her er litt fargepynt på kjøkkenbenken. Mot alt det kvite rundt, er det herleg å vere litt sprelsk.

Her er fargar i spisekroken vår. Gult og blått blei det visst no.

Men våren ser ut til å ha god tid. I dag har det snødd, smelta og snødd igjen.

Gje meg våren no!

God helg!

Herlege fridagar

2011-03-10T22:22:00.003+01:00

No rasar vinterferien her i distriktet, og me har vore ei lita veke i hyttehuset. Stadige ting skal ordnast, malast, fiksast osb., så det blir fri i kombinasjon med småjobbing. Men dette kosar me oss heldigvis med.

Denne gongen hadde me med eit klaffebord som skulle få ny farge. Eg blei ganske fornøyd. På veggen over heng biletet med tittelen "Dronning Sonja og Kongen av Afrika" som blei teikna av eldstejenta her då ho var fire år. Eg synest tittelen er så herleg.

Biletet skal få ny plassering snart for me skal ha inn ei svart tallerkenhylle over dette bordet neste gong me tek turen.

Det blir jo nokre tøyblomar i vasane i ei hytte, men her har mellomstejenta supplert dei kunstige med ein tørka variant i anledning mora sin bursdag.

Og mor fekk også eit par herlege gåver som resulterte i denne draumen av manotallerkenar. Koppane mine i dei same fargane står heime, så desse blir med heim i heimehuset. Og når ungar og mann veit eg elskar blader, blei eit slikt naturlegvis også ei gåve.

No er me heime igjen, men framleis med nokre fridagar. Herleg!

Pssst!

2011-02-09T22:13:00.000+01:00

Eg er berre innom for å kviskre dykk at mannen no er i gang med bursdagsgåva mi; nymåla stove! Dette er hovudønsket mitt, og eg veit det er ei krevjande gåve, derfor så glad no.

Frå før er stova i fargen lys antikk, men etter sju år ser det mindre fint ut og blyantteikningane til ungane har blitt for mange. Derfor er det på tide med noko nytt. Me satsar på noko kvitare denne gongen, nemleg fargen Chi. Gjett om eg gler meg?

To heimesydde

2011-01-25T23:17:00.000+01:00

Det er slett ikkje mykje eg får sydd, men stundom trør eg til.

To puter i denne omgangen, det har blitt meir søm enn tidlegare altså, puter i gåver også, men utan bilete. Ja ja. Denne puta har eg som vår-innslag i stova no. Saman med ein bukett fargerike tulipanar gjer ho meg glad.

Og så hadde eg ei lita pute liggjande som måtte få eit trekk, og slik kom denne til.

Dermed blei det mor og barn. Det er iallefall slik småjentene mine vel å sjå det. Dei leikar med alt som finst i stor og liten størrelse. Sjarmerande, synest eg.

Eg skulle ønske eg hadde meir tid til slikt, for det er ganske triveleg når eg kjem i gang.

Men men. No er planen nokre store puter i sommarlege fargar til slagbenken i hyttehuset. Men det tar vel nokre månader, kjenner eg meg rett, he he.

Bursdagsfeiring

2011-01-23T23:10:00.001+01:00

Så har me etter ein lang sjukeperiode her heime, endeleg fått feira eldstejenta sin bursdag. Det er kjempekjekt med barnebursdagar.

Og denne gongen herma eg etter dette, til mange begeistra jenter sin fryd. Eg brukte ikkje marsipan til blader, men klippa rett og slett ut grønt papir. Takk for ideen!

Og bursdag på denne tida krev sprø og knasande tulipanar i friske fargar. Det er våren som blir invitert inn i heimen. Og her er han saktens velkommen! Finaste tida på året for mitt vedkommande, sjølv om det er tidleg enno.

Så var det godteposane, dei er vel nesten obligatoriske i bursdagane her omkring. Denne gongen inviterte me til kino i auditoriet på skulen der eg jobbar. Storskjerm og godteri passar vel nokre, kan eg tenkje. Her sit ei forventningsfull jente nokre timar tidlegare på dagen med ferdigpakka posar.

Og i anledning bursdagen hadde ho på eige initiativ rydda og pynta på rommet sitt. Det kan mora like :-)

Over her er petshopane sit hus. Og under er "salongen".

Noko rot under sofaen, men det lukkar me augene for. Eg synest ho har pynta fint eg.

Ja ja, bursdagen blei som ho ønska, og då krev ikkje eg som mor noko meir.

Eg gler meg til våren

2011-01-01T12:22:00.003+01:00

I romjula var me nokre dagar i hyttehuset vårt. Der skein sola, ungane rann på kjelke, akebrett og ski, eg las og gjorde lite, mannen likeså. Men det var nokre fantastiske dagar i ei elles mørk tid. Eg måtte fange nokre bilete av sola, for eg blir så glad av å sjå henne.

Her heime kjem ho ikkje så godt fram på denne tida, så ho er sårt savna. Men i hyttehuset vårt dansar ho på altanen heile dagen. Ja, faktisk opna eg altandøra for å kjenne på henne, for å trekkje inn frisk vinterluft ispedd glade solstråler. Og det var ikkje berre eg som var fascinert...

Minstejenta her på 2,5 år syntest det var spennande, men bitande kaldt.

Det er likevel godt å lufte skikkeleg ut før me fyrer opp i ovnen.

Eg gler meg rett og slett til våren, eg. Julepynt skal pakkast vekk i morgon, andre fargar inn. Primula er tradisjon. Og dei kjem nok inn i butikkane denne veka, tenkjer eg.

Det skal bli godt med kvardagar no. Eller kva?

Forresten: Godt nytt år!

God jul!

2010-12-24T12:30:00.000+01:00

Då er eg ein snartur innom for å ønskje alle dykk som inspirerer meg ein herleg og vakker jul. Og det gjer eg med små bilete av Krakowenglane mine som høyrer til på treet vårt kvart år. Eg kjøpte dei eit år eg hadde med meg klassen min til grufulle konsentrasjonsleirar. Dei blei ein etterlengta kontrast den gongen, og dei betyr mykje for meg. Mellom anna minner dei meg om flott ungdom som blei historiemedvitne, som opplevde å kjenne takksemnd for det livet me er så heldige å få leve.

Så legg eg ved bilete av litt annan pynt, noko heimelaga og noko innkjøpt i år. Eg synest det er kjekt å la juletreet bli rikt på innhold av ymse slag. På den måten trekk me minnene og historia med oss framover.

Nyt julehelga!

Oldemors peppermyntekuler

2010-12-19T13:31:00.005+01:00

I dag har me starta på farmora mi sine peppermyntekuler. Dei blir heretter heitande oldemors peppermyntekuler. Ein må la barna få eit forhold til kven dei kjem ifrå, og då blir det enklast med deira utgangspunkt.

Desse peppermyntekulene har fulgt meg sidan eg var liten, då elska eg dei. No er eg litt mindre gira på peppermyntesmaken, men ungane her er annleis. Og godt er det. Då kan me nemleg fortsetje tradisjonen.

I morgon skal kulene dyppast i sjokolade og evt. kokos.

Medan jentene i heimen laga desse kulene, fiksa pappaen kakemennene.

Eg diggar spesielt den forma med mannen med hatt og frakk, eller er det ei dame som ber noko? Eg fekk den og mange andre av ei gammal dame i fjor, og det er kjekt med former som ikkje er så vanlege i dag.

No ligg kakene til kjøling på benken mens små jenter ventar på smaksprøve.

Me er altså så smått i gang med baking. Litt seine i år, for me fann plutseleg på at me skulle skifte nokre soverom, male på nytt osb. To av jentene har overtatt vårt soverom, og det ga dei mykje meir plass. Då kan ein lage små krokar som dei kan opphalde seg i, og det likar dei godt. Her er sofa- eller lesekroken.

Den fine bambien er som dei fleste sikkert ser, frå Den gode feen sin Eplabutikk.

Oppussinga tok tid, kan de seie, men no er såpass mykje på plass at me kan konsentrere oss om det neste: Julen.

Ha ei god innspurtsveke.

Forsiktig jul

2010-12-02T21:51:00.002+01:00

Eg nyt å lese andre bloggar og gler meg over stadig nye innlegg. Og så slår det meg at det er så mange superflinke bloggarar der ute at eg ikkje finn ord. Eg blir imponert over stilteften, iveren og pågangsmotet. Spesielt kjem dette til uttrykk når ein sjølv ikkje finn noko motivasjon over nett dette. Eg les bloggar opp og i mente, men har ikkje så mykje å kome med sjølv. Likevel storkosar eg meg i bloggverda. Tusen takk til alle dykk fine bloggarar som står på.

Her hos oss er desember ikkje berre ein travel månad i seg sjølve, men jobben er ganske intens på denne tida. De skal berre vite kor eg lengtar etter å ha frie ettermiddagar slik at eg berre kan kose meg, men ettermiddagane og kveldane her går til retting av elevtekstar. Det er den desidert tyngste delen av jobben min, og eg kjenner somme tider på ei lyst til å forlate lærargjerninga. Men åra går og eg blir. Så no er desember her igjen med jernhånd på fritida mi. Ja ja.

Eg fresar no likevel innom Fretex med jamne mellomrom og finn ofte kjekke småting. Denne sjiraffen her til dømes, han måtte berre bli med heim. No står han med sviblar og lys på stovebordet og kosar seg. Og så har eg funne fine raude lysestakar som skal kome fram om ei stund.

Og fleire dyr har kome inn i heimen. Dette rådyret (er det eit rådyr - he he) står på pianoet med adventslysa. Eigentleg er eg lei heile pianoet. Eg spelar nemelg ikkje sjølv, men har eit ønske om at jentene mine skal ville spele på pianoet etter morfaren min. Det er over snart 100 år gammalt, frå 1909. Så det blir vel ståande, tenkjer eg. Kanskje eg skal øve meg på ein julesang...

Ja ja, litt sludder her, men iallefall ein lyd.

God helg til dykk alle! Eg gler meg til å sjå oppdateringane dykkar.

Farsdag

2010-11-15T00:22:00.003+01:00

Ein tur på Åhlens ga meg desse herlege reinsdyra. Dei står framme no, og ungane synest det er fint med julepynt i heimen. Dei siste er veldig klare for jul, kan ein seie.

Og det forstår eg godt at dei er. Eg har nemleg hatt julekjensle i vekevis no eg, og det smittar vel.

Når ein lengtar mot jul og fest, er det greit å ha eit lite førjulsselskap for å feire farsdagen. Derfor blei det kjøkkenaktivitetar i dag. Herlege havrekjeks blei laga, lappar og muffins blei steikte.

No er det snart ny veke, og det står mykje på planen.
Ha ei god veke du som kikkar innom.

Dill

2010-11-08T16:02:00.001+01:00

Bitande kaldt i dag... Men eg har no vore ute og henta nokre kvister. Dei er så kjekke til å henge små ting i.

Her har eg hengt opp nokre hjarte eg sydde i går. Det er kjekt å utnytte små stoffrestar til slikt.

Ungane synast sjølvsagt at det er kjempekjekt med slikt. Mellomstejenta her undra seg over om julen no var komen...

Det har han sjølvsagt ikkje, men stemninga er definitivt på veg. Eg gler meg stort til jul, og i år skal han feirast i hyttehuset. Endå kjekkeare.

Det betyr nemleg at me treng meir julepynt, he he.

Oiii, eg har sydd julestrømper

2010-11-06T11:04:00.001+01:00

Ja ja, innimellom får eg det over meg. Det er lenge sidan no, men i går etter å ha lese Borghild sin herlege blogg med dei flottaste heimesydde ting, tenkte eg at eg skulle prøve meg sjølv. Så ideen er ikkje min, men Borghild sin. All æra til henne.

Eg blei igrunnen ganske fornøyd med resultatet.

Her er alså julestrømpar til dei tre jentene mine. Ikkje så mykje julepreg, men det er mykje glede i dei. Og mi største glede er at eg har gjort det sjølv. Det er jo noko med det då.

Eldstejenta sin er i blåtonar. Ho har forlatt alt rosa og foretrekk blått og lilla.

Her er mellomstefrøkna sin. Ho vil ikkje ha blått!

Og så er det minstemor sin. Ho har ingen preferansar enno, he he.

Det var kjekt å sy. Eg håper dilla held seg noko lenger enn ein dag eller to.

Her skin sola i dag, det er laurdag føremiddag og eg har planar om å dra ut for å kjøpe inn fint papir. God laurdag!

"Nytt" skap på kjøkkenet

2010-11-05T22:26:00.001+01:00

Det som er heilt klart her i heimen - det er at husbonden ikkje liker det "nye" billyskapet vårt. Det har endra farge frå kvitt til svart. Sjølv synest eg det blei veldig kjekt. (Eg har ei naudløysing om eg skulle endre meining. Me har framleis dei kvite vitrinedører til hyllene, dei er berre flytta til ei anna hylle i eit anna rom. Me kjøpte nemleg billige vitrinedører i bjørk på Finn som me malte svarte. Eg er jo litt vaklande når det gjeld slike ting, så denne løysinga er eg fornøgd med) Vel, saken var jo den at eg syntest det kvite skapet var så kjedeleg til veggane me har på kjøkkenet (eg er enno ikkje overtydd om at eg skal male dei kvite), så derfor blei vitrinedørene malte istaden.

Det gjenstår litt finskjering av maling rundt karmen, men eg måtte berre ta skapet i bruk.

Så kom Anne Black-knottane på plass. Det blei ikkje så verst.

Soppen er kjøpt av Den gode feen tidlegare og flyttar litt rundt omkring i heimen.

Det er så mange som syr så mykje fint her på bloggane.

I dag har eg blitt inspirert av bloggsaum, så eg har faktisk sydd på symaskina mi. Snart skal eg vise dykk resultatet...

God helg!

Kvardag igjen

2010-10-17T13:34:00.001+02:00

Det er klart for kvardag igjen. Haustferien er alltid kjærkomen her hos oss. I fjor hadde me tidenes tur til København med kjekke kafébesøk, leikeplassar, butikkar og dyrepark. I år trekte me oss meir tilbake og holdt oss i hyttehuset som me endeleg kan bruke. To heilt forskjellige feriar, like sjarmerande innanfor sin sjanger.

I hyttehuset fekk me ordna meir på plass, malt, rydda og slappa av. Sjølv om hyttehuset i hovudsak skal bere preg av å vere eit sommarhus, må me tilpasse det litt til kaldare dager også. Her er "skrivekroken", eit gammalt bord frå svigermor, ein krakk frå ei gammal dame, bestemor si veske, tallerkenhylle, lampe, miniglobus og reinsdyrskinnet på krakken (heilt nytt og ubrukt) frå Fretex.

Og i venstre hjørne heng Borghildposen som er har hekleria mine i. Eg kan nesten ikkje hekle, men har no kasta meg over eit lite prosjekt som eg håpar kan bli brukande. Er ikkje posen fin? Han er med meg overalt for tida.

Og så har me pakka og gjort oss klare for heimturen, kjøkkenøya og hylla over er eg blitt så glad i, så eg kan ikkje dy meg for å leggje ut eit par ekstra bilete her.

No kallar kvardagen igjen, møter, retting (ja, eg har ikkje retta noko i ferien!), treningar. skule og barnehage. Men inni der ligg også komande strikkekveldar med stearinlys og god grøn te.

Bestikkpose

2010-10-14T21:00:00.004+02:00

Før me drog på haustferie denne veka, var eg innom mi gode venninne Cecilie, som er dagleg eigar av Gardintrylleriet. Ho er bånn sløv på marknadsføring av eiga bedrift, ikkje har ho nettside, ikkje har ho blogg og ho er ikkje på Epla eller Facebook. Kva i all verda? Men ho har sine faste kundar i Stavangerregionen som held ho i live. Ho syr nemleg gardiner, puter og slikt på bestilling, og det er nok å gjere. Men det kan jo alltid bli meir, ikkje sant?

Sjølv synest eg ho må komme seg på nett og vise kva ho syr. Iallefall, eg var innom henne for å få sydd kjøkkenliftgardiner til hyttehuset vårt, då ho i forbifarten nemnde at ho syntest det var så kjekt med bestikkhaldaren som ho og mannen hadde heime.

Ein kvafornoko? spurde eg.

Jo, då kom det fram at dei ofte gløymde bestikk når dei laga mat og at det var så praktisk å ha bestikket liggjande på kjøkkenbordet i ein passande stoffpose ho hadde sydd.

Ah, for ein sjarmerande ting å ha, sa eg. Og så oppdaga eg at det låg ein liten bit av dette stoffet med favorittfargane mine framføre meg...

Då eg skulle hente gardinene eit par dagar seinare, sto det to slike posar klare til meg. Ein til bestikk, ein annan og noko større til serviettar eller det som måtte vere praktisk å ha i nærleiken på bordet.

Eg har prøvd meg på både innbrett og utbrett, men likte utbrett best. No står bestikket i nærleiken kor enn me er.

Under her er kjøkkenøya vår, og retroposen er eine sida ev ein fantastisk stoffpose fra Borghilds b-design. Tuusen hjarteleg takk. (Posen har fått ny stad no, så bilete kjem seinare, då med andre sida fram).

Nydeleg ver i dag, modne eple og pærer i hagen, fin tur langs sjøen med minstemor, heimelaga potetstappe til middagen og eigensnekra brownieskake til kaffikos. Haustferie var det visst. Mmmm!

Haustferie i hyttehuset - velkommen inn!

2010-10-12T20:45:00.005+02:00

No er dørene i hyttehuset på eit vis opna. Me er her på haustferie og storkosar oss, sjølv om det framleis er mykje arbeid som blir gjort og som skal gjerast. Det store i denne omgangen er at no er golva ferdige i heile huset minus trappa opp. Det betyr at me kan ta ibruk alle romma, og det er rett og slett skamherleg. De skal derfor få kikke litt inn, sjølv om det tar tid å finne riktig plass til det meste.

Her er bestastova (tv-stova, he he).

I denne stova er alt brukt, anten kjøpt via Finn, arva eller kjøpt på Fretex. Det gjeld vel nesten heile huset. Golvet er slipt, kvitbeisa og lakka, veggane malte ørten lag med kvitmaling (vannbasert har dårlegare dekkeevne, sukk). Det store tv-skapet er ein kopiert ide frå BodilBo og ei gullgruve for oss med stor og klumpete TV og barn med fargestifter, spel etc. Alt ligg trygt og godt bevart + skjult inni der.

Her ser det magasinholdaren her i hyttehuset, ei gammal veske etter mannen si bestemor. Eg syntest veska var så skjønn at ho måtte i bruk på eit vis.

Så vandrar me inn på kjøkkenet der me omsider har fått ferdig det meste. Denne kjøkkenøya frå Ikea er unntak fordi ho er kjøpt ny. Me har brukt fleire dagar no på å få henne på plass, for det viste seg å ikkje vere heilt enkelt med skeive golv og veggar. Men no står ho støtt som fjell (håpar eg).

Under her er kjøkkenet sett frå andre stova, spisestova vår. Kjøkkenøya er heilt enkel, men ein draum når ein skal lage til noko til dei små. Kjekt å stå med fjeset mot dei når ein lagar mat. Oversjå rotet på kjøkkenbenken! Den svarte lysestaken er ein gammal messingstake frå 90-talet som er lakka svart. Passar godt her, synest eg.

Og når kvelden kjem og noko godt dukkar opp på benken, kikkar dei små fram...

Haustferie er herleg!

God ferie til de av dykk som har det no.

Fargerike bøker piffar opp

2010-10-05T14:21:00.003+02:00

No som hausten bankar på, kjenner eg ei dragning mot fleire fargar i heimen. Eg har ein del bøker som eg har i hyller med dører foran. Men no skal nokre av dei fram i lyset og setje farge på ein del av stova vår.

Utgangspunktet er dette hjørnet her. Den mørke hylla har vel vore fylt med litt ymse, tenkjer eg, he he.

Men så dreg eg fram nokre bøker...

Og straks blir det meir liv i stova. Dette er datakroken min. Eg sit ved dette bordet som er eit loppefunn, på stolen frå Fretex. Litt malingsflekkar på han på ryggen, men pytt.

Det blir meir liv med bøkene sortert etter farge. Eg er eigentlieg ikkje tilhengar av slik fargesortering, men eg fann ikkje grunnar til å skulle vere imot så lenge eg kjenner meg glad av det.

Og den elles noko grå og triste kroken i eine stovehjørnet er kjempefin no, synest eg.

Og av alle ting, så passa den gule vasen eg kjøpte i Århus i fjor godt inn, og dei turkise lysestakane eg malte for nokre uker sidan fekk fin plassering.

Eg fann forresten også ein svart settekasse på Fretex her om dagen, og den skal eg tapetsere med litt fargerikt papir og henge opp på veggen her. Håpar det blir fint.

God veke!

øs pøs

2010-10-04T14:06:00.000+02:00

Øs pøs regn. Då tenner me eit lys og så er alt fint.

Og eg samlar på Figgjo Clupea i tillegg til Victoria.

Lekse til mandag!

2010-09-26T21:31:00.001+02:00

Eg hadde eigentleg ikkje tenkt så mykje på dette, eg, at noko av leksa til skulejenta mi er å spisse blyantane. Ikkje før eg såg beskjeden på planen hennar no før helga.

Det er liksom slikt eg trur gjer seg sjølv. Ikkje fordi at eg ikkje har spissa blyantar i mitt liv. Det trur eg eg er meister på. Som den kontorrotta eg er, så har eg hatt stor glede av slikt. Eg har alltid hatt denne nydelege kjensla av kontroll når eg har hatt ein nyspissa blyant i handa mi. Då er eg liksom klar; førebudd og parat til dyst.

Ta ein av desse blyantane her i handa di, for eksempel, og kjenn på den nye starten du får når du skal til å skrive. Blanke ark og spisse blyantar... Mmmmm.

Eg spissa naturlegvis også mine eigne blyantar når eg fyrst var i gang. Alle fekk seg ein runde eller to i spissaren, berre sånn for ordenens skuld.

Men at eg måtte få ein eksplisitt beskjed frå læraren til jenta mi om hennar blyantar, det var eg ikkje førebudd på.

For å vere ærleg så trudde eg dottera mi dilta etter i fotspora mine...

Akk ja, slik kan det gå.

Ha no ei god veke, gjerne med spisse blyantar.

Kva kan eg gjere med dette skapet?

2010-09-24T00:02:00.001+02:00

Eg viste bilete av dette gamle medisinskapet i fjor. Eg fekk det i eit dødsbo, og har enno ikkje kome fram til kva eg kan og vil gjere med det. Eg tenkte vel i fjor at det skulle vere på barnerommet i hyttehuset slik at jentene kunne leike doktor og pasient. Men eg er liksom ikkje like gira på det no.

Eg veit rett og slett ikkje kva eg vil. I fjor haust var me i København og då var eg innom hos Susan Liebe. Ho hadde metervis av liknande skap som ho hadde malt i herlege fargar og tapetsert inni.

Eg likte dei kjempegodt. Men eg er framleis i tvil. Skal eg ha det på veggen i stova i hyttehuset, på soverommet, på barnerommet... Her i heimen kanskje?

Har nokon tips til bruk?

Snopefredag

2010-09-17T15:52:00.004+02:00

Det er rart kva ein får gjort når ein har dårleg tid fordi ungane kjem heim frå skole/skal hentast i barnehage. Då går eg raskt frå den eine butikken til den andre, raskar med meg litt av kvart utan å tenkje så mykje over det, eg fortener det jo ;-), og så hastar eg heim og er heime akkurat i rett tid.

Slik var det i dag. På ein grå regntung dag er det ekstra triveleg med fargar. Og når den eine butikken etter den andre har slikt å tilby, er det lett å bli overtala.

Her er noko av snopet mitt: serviettar, lysestake, te, kjøkkenklutar, brett og oppvaskkost. Eg gler meg til bruken. Teen skal eg kose meg med i kveld i ein herleg kopp med kjekke lys til, oppvaskkosten skal plasserast i hyttehuset etterkvart.

Eg blir rett glad når eg ser den oppvaskkosten. Kor praktisk han er eller ei, det får så vere, men glede kan han spreie. Det kan eg ikkje seie om Jordan sine, he he.

Forutan dette, blei det ny herleg bursdagskjole til 7-åringen her frå Noa Noa, strikkekjole til meg sjølv, regnkåpe og støvlar i ei gåve. Støvlane er innpakka, men dei såg kjekke ut. Eg hadde fyrst tenkt på Ilse Jacobsen-støvlar, men så anbefalte dama i butikken meg desse nyankomne Vikingstøvlane som var av nytt design, Blæst (klik biletet for meir info). Støvelen har visst fått Norsk designråds pris, er mykje betre på foten og har fem fargerike snorer som ein kan skifte med humøret (kanskje ikkje med veret, he he).

Håpar iallefall at mottakaren blir glad.

Ja, ja. Det blir ei fin helg, trass regnveret.

God helg!

Fortsatt framgang

2010-09-16T15:27:00.002+02:00

No er det bestastova som blir ferdigstilt i hyttehuset. Veggane malte me i sommar, men golv, tak og dører har stått igjen. Det gjer bonden her noko med i desse dagar. Han har no slipt ned golvet og beisar det i kvitkalka beis slik me gjorde i kjøkkenstova vår tidlegare.

Dette er dagens rapport!
Eg gler meg masse til også den stova blir ferdig.

Sist helg malte me eit tv-skap. Ideen er slett ikkje min, eg fann han hos Bodil-Bo, som igjen hadde funne han hos ei anna. Så denne ideen har forplanta seg. Eg kunne ikkje motstå den sjarmerande løysinga som blei presentert hos Bodil, og som iallefall er aktuell for oss som har store monster-tv-ar. Dermed heiv eg meg ut på Finn, sendte mannen avgarde sørover i fylket vårt, fekk heim skatten og kjørte han til hyttehuset. No er skapet mala i ein lys turkis farge, isvann. Og eg er på jakt etter tøffe håndtak.

Apropos håndtak, så hadde eg eit innlegg tidlegare der eg ba om innspel til handtak på ein heimesnekra kommode eg fekk av onkelen min. Fjeldborg-Ingrid kom med tipset om handtak i skinn frå Karmameju. Eg likte ideen straks og no er dei på plass. Eg skal få lagt ut bilete av stasen.

Håndtaka til tv-skapet skal likevel vere annleis, eg diggar Anne Black sine, men får ta ein kikk litt rundt omkring her også. Tips er alltid kjekt å få uansett.

Så takkar eg for meg med eit lite bilete frå altandøra i hyttehuset, der har det kome opp fem perlestrimler laga av små barnehender. Tanken er at heile døropninga skal dekkast med slike. Men me kan ikkje tvinge barna til å trekke perler på tråd, så prosjektet har godt tidsramme.

Ha ein fortsatt fin dag i regnveret.

Favorittfargane

2010-09-13T21:39:00.004+02:00

Eg elskar alt det fargerike eg ser rundt omkring på bloggar og i interiørblader. Eg får godt humør av det rett og slett. Kjenner at det er solstråler på ein vinterdag for meg.

Og så har eg mine eigne favorittar blant alt det herlege. Og her er dei. Eg berre elskar den grønturkise, det lilla, det blå og grøne. Her er dei investeringane i hyttehuset som ikkje er brukte. Eg har kjøpt det inn nytt, eit lite brot på prinsippet, men fullt tilgiveleg etter mine auge.
Noko kan ein berre ikkje gå forbi. Det er noko med at når ein møter på det som er meint for ein, så skal ein stoppe og lytte til det, ta det til seg, ikkje springe hastande forbi av prinsipp. Ikkje sant ;-)

Her er brødboksen frå Kremmerhuset, litt liten kanskje, for dei vanlege brødlengdane er i lengste laget. Men med fem i hus, spå blir det sjeldan eit problem i praksis. Brikka under er frå Ikea, og brettet frå Åhlens. Perfekt match!

Desse lekre lange skjeiene frå Rice kunne eg ikkje gå ifrå. Eg elskar å spise yoghurt med lange skjeier, eg elskar langse skjeier til det meste. Og når fargen sit som eit skot (himmel, er ikkje nynorsk herleg, ha ha), så er heller ikkje den handelen noko å diskutere. Ikkje sant?

Til sist, når Kremmerhuset byr på lekre skjønne små vasar i favorittfargane, må dei med heim i nettet.

Eg blir så glad så glad.

Til sist må eg berre få slenge på at eg også elskar den kvite kjøkkenbenken min. Heime har eg svart kjøkkenbenk, og det er ikkje like stas. Eg vil gjerne ha ny, men bonden i heimen seier eg må vente minst ti år. Kan de tenkje dykk...

Mens me ventar på eplene

2010-09-12T21:46:00.001+02:00

Nettopp heimkomne frå ei herleg helg i hyttehuset. Stadig fleire ting fell på plass, men lista over gjeremål ser ikkje ut til å bli kortare av den grunnen. Det dukkar stadig opp nye idear og prosjekt. Men parallelt med prosjekta, så lever me litt også då, he he.

Denne helga hadde eg trudd me skulle kome heim med epler i bøtter og spann, men det blei med tanken. Men me fortvilar ikkje for det. Eg har nemleg kome over nokre herleg eplefunn på Fretex, både her i byen og i Ryfylke. Denne herlege eplekrukka er innkjøpt i Ryfylke til stor fryd.

Og så datt eg over ei korg med desse seks epleglasa på Fretex i byen. Etter å ha hive meg over korga, slo tanken meg om at det kanskje var nokon si korg... Eg blei flau og spurde den næraste eg såg om innhaldet var hennar, men nei. Dei var på veg ut i butikken.

Og då tok dei strake vegen oppi mi korg. Kan det passe betre med slike epleglas i hyttehuset? Nei, dei er perfekte til ein stad der sommarkjensla skal råde, der hausting av bær og frukt skal bli ein tradisjon.

Neste gong er nok eplene klare. Då skal det bli eplesaft. Men eg skulle gjerne hatt ei oppskrift på eplemost også... om nokon har.

Då eg kom heim frå hyttehuset, låg det ein fin og mjuk pakke i postkassa vår. Gjett om innhaldet i den var lekkert? Det er det alltid frå den kanten. Snart får de sjå.

Gode kvelden!

Lukke i stova

2010-09-10T09:28:00.000+02:00

Det er fredag, eg har fri, sola skin. Eg har henta inn avisa og kokt teen min. Lukke i stova.

Og så har eg drukke min te og er klar for å ta fatt.

God helg, alle saman!

Flott malever

2010-09-05T22:00:00.004+02:00

For ein herleg dag, ja for ei herleg helg me har hatt. Nydeleg ver, sol og god temperatur. Eg synest nett eg var ute og kjøpte inn så mykje haust til barnehagebarna våre, men det har ikkje blitt tatt i bruk enno. Herleg!

Det går trått i hagen vår for tida, eg har ikkje heilt dilla lenger på hagearbeid, men det er kjekt å vere ute likevel. Maling av småmøbler er for tida kjekkare enn ugras.

Så då har eg tatt med meg diverse Fretexkjøp ut i hagen for å fornye dei. Og fargane er blogginspirerte, som de kanskje vil sjå.

Her er til dømes Borghild sin herlege turkise farge. Eldstejenta skal få tallerkenhylle til rommet sitt slik at ho kan leike bibliotek og lage utstilling der. Den lille settekassa er til minstejenta vår, ikkje for at ho vil ha ein, men fordi storsystrene hennar har kvar sin. Det er slik tralten er her, he he.

Her er mellomstejenta sin settekasse (ved sidan av jentene sine sjølvdyrka gulerøter som ivrig har blitt hausta). Han skal få Lykke og Lykkeliten sin herlege lillafarge. Storesyster har allereie sin ferdige settekasse. Desse kassane skal visstnok bli heimar for Petshopane til jentene. Desse to siste her skal sjølvsagt også få noko papir i botnen.

Og så er det denne herlege krakken eg fekk i fjor. Han har no blitt slik:

Og litlebror krakk kjøpte eg på sjukeheimen eg jobba på nokre sommarar for ca 20 år sidan (uff som tida går). Denne minikrakken har vore med meg i sin trekvite drakt på hyblar rundt omkring, men no skal han inn på eldstejenta sitt rom som går i blått og turkist med innslag av lilla. Kanskje eg skal prøve å få tatt nokre bilete der etterkvart.

Desse lilla lysestakane og dei turkise bak, er i hardtre, teak trur eg, eg eg fekk dei på Fretex for tilsaman 70 kroner. Eg diggar dei allereie. Og dei turkise malte eg litt før dei andre, så no har dei fått plass på bordet i stova.

Kjekt med litt fornying. Takk for gode fargetips her. Eg diggar pastellar meir og meir, sjølv om eg ein gong på 80-talet sverga at eg aldri meir skulle ha noko i pastell.

Ha ei god veke!

Før, og litt etter

2010-08-22T19:34:00.002+02:00

Eg kan ikkje skrive etter i normal forstand, for me ha framleis mykje ugjort i hyttehuset. Men det er no framsteg å vise til, om ikkje anna. Her er eit bilete av entreen vår før. Dvs. me var godt i gang fordi me hadde rive mykje tapet og fjerna mange spikrar, men likevel ikkje malt skvetten.

Så har me i sommar malt veggane og nokre av dei gamle møblene som stod i huset. Spegelen og bordet under her var i lakka furu, spegelen med fuktskader. Dei blei pussa, grunna og malte. Eg synest dei blei ganske fine, eg. Og så har veggane fått seg nokre strøk med maling. Dørlister og slikt står på gjeremål utover hausten. Men det kjem seg.

Og så var det over til stova. Her er eit nesten før-bilete. Tapet er rive vekk etc. Og me er i ferd med å skulle fjerne veggen mellom eine stova og kjøkkenet. Dette her skal vere eit allrom.

Og i sommar har veggar, møbler, kjøkkenskap fått maling, benkeplata som var eldgammal og altfor låg har blitt ny. Mykje gjenstår, men mykje er sanneleg gjort også.

Eg er på jakt etter ei passande kjøkkenøy som skal stå der den lyse krakken står. Anten må eg finne ei tøff mobil ei, eller så må eg kjøpe meg ein meir fast modell frå Ikea. Då vil det bli med to skuffeseksjonar i, tenkjer eg. Men her er eg ikkje sikker på kva eg vil enno. Me må iallefall ha litt meir benkeplass.

Av større arbeid har me igjen golv og tak i andre stova, golv og tak i entréen, dører, lister, isolering fra kjellaren og opp, installasjon av vedovn, reparering av pipe... akk ja. Det blir visst ein totalrenovasjon av det heile.

Men så skal me jammen meg skamkose oss etterpå. Det gler eg meg til.

Gode kvelden!

Eg berre malar, eg

2010-08-19T21:38:00.002+02:00

...og syr litt.

Me skriv august. Tida denne sommaren har flydd avgarde i ein fart eg ikkje har kunne notert meg iallefall. Skulen er i gang igjen, eldstejenta i andre klasse, dei to andre i barnehagen. Minstedokka vår har hatt oppstart denne veka, og det er herleg å konstatere at alt går godt.

Sommaren har i siste delen gått til malearbeid. Eg har vel aldri malt så mykje før, sjølv om eg alltid har malt og styrt i veg tidlegare. Me har malt veggar, golv, tak, kjøkken, krakkar, hyller, kassar, skap, speglar og slikt (alt skal jo vere gjenbruk). Er ein i gang, så er ein i gang! Eg har til og med kost meg, for radio er fantastisk selskap når ungane har besteforeldrer å vere med.

Og så har eg og mora mi sydd litt diverse. Gardiner er komne på plass i nokre rom. Her har barnerommet fått fargar. To skåp (det eine med ei for stor dør og det andre utan) fekk forheng. Det er slike store skåp som ein kan gå inn i, og jentene her har leika prøverom. Inni skåpa heng det ein stor spegel, kjolar på hengjarar og anna tøy i hyller. Så kan små frøknar stå der inne og kle seg som det passar.

Her er blomstrande barneromsgardiner. Til kvite veggar og med steikande sol utanfor er dei midt i blinken for små glade jenter.

Det er to store vindauge på rommet, og mellom dei vandrar nokre skjønne elefantar fortrylla av ein fe i Stavanger. Passa dei ikkje godt til gardinene?

Inne på gjesterommet finn ein meir dempa gardiner. Desse har lyse blå striper med litt turkist i. Det er godt med eit svalt rom å trekkje seg tilbake i. Mon tru dette blir mitt eige rekreasjonsrom etterkvart. Utanføre renn ei elv med herleg brus, så forholda ligg iallefall til rette for sjelepleie.

Nede på kjøkkenet i 1. etasjen møter ein no litt meir farge, men gardinene er ikkje klare. Her skal eg ha kvite liftgardiner i linstoff. Trur det kan bli bra. Og dei gamle blå flaskene mine frå studietida har fått kome fram igjen. Blått er godt!

På dette biletet er nokre av småprosjekta. Hylla har vore brun, fatet øverst på det var trekvitt, det har no fått maling og tapet. Likeeins med krakken nedanfor som var knallande raud. Dei to gule vasane fann eg på ein loppemarknad og eg fekk nokre rare blikk frå folk. Inne i ei noko mørk låve såg dei mindre spreke ut. Eg diggar dei! Og medan me først er inne på den loppemarknaden, må eg få vise dette kuppet:

Denne stålkorga er opprinneleg ramma rundt ein vindunk/-ballong, noko eg er mindre interessert i. Eg fekk både korga og ballongen for 150 kroner. Jippi. Korga her er noko rusten enkelte stader, så om eg skal ha pleidd i henne,må eg kanskje male med litt hammarlakk.

Ja ja, mykje gjenstår enno, men me har hatt fine veker i hyttehuset vårt. Og fleire turar står for dørene.

God kvelden til dykk!

paris, saft og vase

2010-07-18T22:50:00.001+02:00

He he, var ikkje det ein snaisen tittel? Seier ingenting, ikkje sant... Poenget er at eg ikkje kjem på noko som bind saman dagens innlegg.

Det blir nesten berre søndagsblogging no for tida. Dagane flyg og det gjer forsåvidt me også. Denne veka har me vore i Paris med dei tre jentene våre. Ein kjekk by, men med dårleg tilrettelegging for barnevogner. Med to vaksne gjekk det imidlertid greitt. Jentene våre blei teikna, me var oppe i Eiffeltårnet, i Disneyland og elles småturar både her og der. Det er mykje å gripe fatt i i Paris, og me skal definitivt tilbake. Me blei heller ikkje avskremte frå å reise til storby med små barn. Lite shopping for mamma, men det var heller ikkje tanken. Eg kjøpte meg ein kakaoboks og ein boks til hårklemmer!

Og så bar det rett heim til feiring av toåringen vår.
Veret blei finare enn meldt, og dermed kunne me vere ute. Ikkje heilt planlagt, men det gjekk fint. Me henta maten inne, herleg suppe med rundstykker til og heimelaga hylleblomstsaft som eg hadde i desse Åhlensflaskene.

Eg likar dei så godt, og etter at eg fekk Dymoen i hus, er alt blitt endå kjekkare. Det heile blir litt meir spenstig med svart merkelapp på.

Fiskeuppe til barnebursdag høyrest kanskje lite barnevennleg ut, men minstejenta elskar fiskesuppe, så då er saka klar.

Her er altså eit bilete av kjøkkenkroken vår. Me har ein benk laga av kjøkkenskap og madrass som me titt og ofte slenger oss ned på. Eg vurderer nytt trekk på han no, men veit ikkje kva slags enno.

I går var eg forresten ein kjapp tur innom Ikea, og der gliste denne nydelege gule vasen under her imot meg. Eg kunne ikkje gå forbi, fargen var magisk og sommarleg. Dei andre vasane her er frå Fretex, og dei står på ein kommode som onkelen min har laga. Han manglar håndtak og eg klarer ikkje bestemme meg for kva type eg skal ha... (eg er vaklevoren i det meste ;-) )

Veit de om nokon som sel tøffe og enkle håndtak?

Ha gode dagar vidare. Sommaren blir ikkje så varm i år, men me får gripe dagane som best me kan.

Inne!

2010-07-11T17:53:00.001+02:00

He he, eg skriv "Inne!" i overskrifta her fordi me no har overnatta i ein nyare versjon av hyttehuset. Femåringen heiv beina på bordet for den lukka.

Men me er vel rett sagt ikkje inne i tradisjonell forstand. Mykje gjenstår, og me kan ikkje møblere fordi elektrikaren skal ha si tid til det han skal gjere.

Desse "trådsnellene" er hans domene, eg blir forvirra av å sjå på kor mange ledningar som skal plasserast på rett stad. Godt eg ikkje driv med den slags.

Men me tok oss no likevel litt til rette no i helga. Og så rydda me vekk igjen før me drog heim. Berre for å få nokre gode augneblinkar.

Det som kjenneteiknar allrommet er lyset. Det finst mange vindauge der med fin natur utanfor. Å sitje på benken eller stolen og nyte lyset og ein god kaffi ein laurdagskveld klokka 22.30 er ikkje å forakte.

Og så kjem søndagen, og tankane mine flyg i 220 km/t. Kvar skal eg ha alle tinga eg no har samla inn frå Fretex, Qxl og Finn + andre menneske plasserast? Tanken er at huset skal møblerast med brukte møbler. Og førebels trur eg eg har klart meg overraskande bra.

Her skal ovnen stå. (Golvet ser noko mørkare ut her enn i verkelegheita.)

Og denne brune hylla skal bli kjøkkenhylle. Eg fekk henne av ei gammal dame, og eg trur ho kan bli bra med litt kvitmaling.

Ja ja, det skal bli nok å hengje fingrane i framover også.
Det er forresten nokså stille her på bloggane rundt omkring. Sommaren har overtatt for daglege gjeremål og det pausast i dei fleste heimane.

Fortsatt god pause!

Sommar, sjø og strikk

2010-07-08T23:32:00.001+02:00

Det blei strandtur i dag. Me var vel ein liten vennegjeng aleine på stranda tross det nokså fine veret. Då NRK lokalen skulle intervjue badefolk, fanst det ingen alternativ, så dermed blei det deltaking for barna i ei sending. Stor stas, sjølvsagt. Bading i 16 graders sjø var sjølvsagt også stor stas.

Og så skal eg gjere klar for eit nytt prosjekt. Denne herlegheita skal strikkast.

Eg kan ikkje la modellen forbli ustrikka når eg har ei to år gammal jente. Han er berre råskjønn, både i form og farge. Og Drops har visst 30% sal ut juli, så det spørst om det ikkje blir ein liten handletur snarast. Seinsommar og haust plar vere strikketid for meg.

Men hausten er jo ikkje komen enno, så eg skal berre kjøpe inn og ha klart.
Trur eg ;-)

Sommar og blomster

2010-07-08T13:36:00.000+02:00

Det er sparsamt med sommar for tida. I går vart det nesten slik at pleiddet kom fram, mens i dag kom sola på besøk. Det er alltid kjekt, då stormar me ut i hagen alle saman.
Eg klippar plen medan jentene her leikar i hage og leikehytte. Det gir sommarkjensle.

Og så plukkar me nokre blomar og har i vannkar (Ikea sel sine kar til halv pris no om dagane).

Og hos Søstrene Grene fann me i går denne herlege lilla kanna. Kjempekjekk sidan ho kan stå ute og samle opp regnvann til seinare vanningar. Her er det minstejenta som vil vanne mamma sitt blomsterbad.
For når dei store gjer noko slikt hos oss, vil dei små umiddelbart gjere noko liknande...

Her er det eldstejenta på sju som ivrig lagar eige blomsterbad av eit vaskevannsfat me fekk av ei gammal dame i fjor.

Og her er mellomstejenta sin variant. Ho valde ei ildfast form til sitt blomsterbad.

Det er så kjekt når jentene her kosar seg ute i hagen.

Ser de solskuggane i dette badet? Det er viktig å fange sei når dei er her, for no er dei borte. Eg håpar likevel dei kjem att for me har planar om strandtur seinare i dag.

Ha ein flott dag!

Speseri-, krydder-, mel- eller kjøkkenhylle?

2010-07-07T00:14:00.002+02:00

Eg er på jakt etter ei, ja produktet har mange namn: kjøkkenhylle, melskuff, speserihylle eller krydderhylle til å ha i hyttehuset. Eg har sett mange har nemnt at Ikea har desse, men eg finn ikkje noko på nettsidene anna enn at hylla må ha vore i serien Förhöja.

Eg ser henne på dette litle biletet som dukka opp, men hylla ser ikkje ut til å vere i sortimentet. Eg ville så gjerne hatt ei slik, eller ei liknande (ikkje i plast). Er det nokre som har tips til kor eg kan finne? Hylla må vere i ei moderat prisgruppe, under 500.

Eg har sett råtøffe (og rådyre!) eksemplar (biletet under) hos Tuvas hus, men dei er nok for ei anna kundegruppe enn meg.

Er det nokon som veit kor eg kan få meg ei enkel slik hylle?

Sjå, ho syr!

2010-07-05T14:45:00.008+02:00

Eg syr! Av alle ting har eg no sydd fleire kveldar på rad. Det har blitt eit par vimpelrekker til, og så har eg sydd ein kjole til sjuåringen min. Kjekt! Eg må sy mens maskinen er varm, for eg kjenner meg sjølv godt. Derfor flyt heile spisestova akkurat no med stoffer og trådar, ein symaskin og anna syrot. Det får stå si prøve, for no er det Aksjon Søm her i heimen. Eg har planar om å sy gardiner til hyttehuset denne veka, men kjenner at akkurat den syinga ikkje dreg meg mot maskinen. Men eg skal prøve. Det er ikkje lenge igjen no før eg skal hengje opp gardinstengene som ligg på vent i gangen her heime...

Her er ei ny vimpelrekke eg har sydd.

Førebels heng ho i jentene si leikehytte. På fine dagar (som i går) heng eg henne ut, og på ringare dagar (som i dag) heng ho inne. Denne rekka har nokre minne med seg. Ho inneheld farmor sitt dynetrekk gjennom maaange år, mine jenter sin nattkjole som mormor sydde til dei av eit godt Høie-stoff då dei var mindre, to Fretex-funn og eit Stoff og Stil-kjøp.

Og under her er den andre rekka av same stoffene, berre dobbelt så lang. Ho heng oppå den blå-turkise-grøne som eg laga først for eg har ikkje bestemt meg for kva eg skal gjere med dei enno. Det ser nesten ut som eit sirkus, ikkje sant? Somme tider trur eg me har sirkus her i heimen... (Beklagar dårleg farge og kjedeleg bakgrunn, men det er det eg kan tilby per no;-) )

Denne nye rosa-oransje-gule vimpelrekka trur eg blir brukt i bursdagen til snart-to-åringen her i heimen om nokre veker.

Mens eg sat og laga desse, las hyttemannen min høgt frå boka "Unntaket" av den danske Christian Jungersen. Ei glimrande sommarbok, ifølgje leiaren for Bokprogrammet på Nrk, Hans Olav Brenner. Han var innom Sommeråpent forrige mandag (12:40 ut i sendinga) og anbefalte sommarlektyre. Dermed blei det eit lite nettkjøp seinare den kvelden som eg og hyttemannen no kosar oss med; han i ein godstol med boka i handa, eg med munnen full av nåler ved eit rotete spisestovebord. Herlege fellesstunder!

Eg tenkte også at ei slik vimpelrekke med stoff som ein mottakar har forhold til, kunne vore ei fin bursdagsgåve. Det vil i så fall innebere ein telefonrunde til venner og kjente av mottakaren, men hadde ikkje det vore koseleg? Kva med eit gammalt dynetrekk, ein nattkjole, ein favorittkjole eller bluse? Mon tro om eg får til ei slik gåve?

Ja ja, ha ein fin dag vidare gode bloggarar!

Det lakkast og lir.

2010-07-03T02:04:00.001+02:00

Det lakkast i hyttehuset for tida.
Golvet har no fått fem strøk med silkematt lakk. Før det blei det beisa med to strøk kvitkalka interiørbeis.

Bileta er frå mobil, altså greie nok, men ikkje optimale. Resultatet er imidlertid optimalt ifølgje hyttemannen. Eg har ikkje sett golvet på seks dagar og kan derfor ikkje verifisere påstanden.

Men eg trur han når han seier det.

No er det berre listing og litt fiksing på elektrisitet, så kan eg starte innvaderinga. Eg gler meg!

Om sko og sal

2010-07-02T13:27:00.005+02:00

Sal er kjekt. No er det berre å slå til. Men som trebarnsmamma blir det av og til veeeldig mykje klede i heimen. Sidan alle er jenter, blir det mykje arving og lite kasting. Dermed hopar mengdane seg opp. Ikkje av den grunnen at dei arvar, men av den grunnen at eg synest dei også må få litt nytt, ikkje sant? Mellomste jenta her har eit skap som er så proppa at det er vanskeleg å få ut skuffene.

Når det no er sal og eg har lyst å kjøpe massevis av dei lekre kleda, må eg derfor bremse meg sjølv.

Derfor har eg no berre kome heim med eit par sko til veslejenta vår som blir to år denne månaden. Dei er av merket Angulus og er kjempegode på foten har eg blitt fortalt.

Sko skal ein jo ikkje arve, og dei to eldste jentene har alltid fått nye sko (- selskapssko). Men så er det vel slik at ein blir meir slepphendt og avrunda etterkvart, så minstejenta har brukt nokre arvesko innimellom. Men no skal ho få bruke desse herlege lilla sakene så mykje ho (og eg) vil. Eg skal ikkje tenkje at dei skal halde lenge og til alle ungane, ho skal få ha dei for seg sjølv, og ho skal få bruke dei til fint og til kvardags.

Eg gler meg til ho har vakse ein liten cm til, då er ho og eg klare, tenkjer eg.

Sal er altså kjekt, men ein må vite å styre seg også. (Eg klarte meg denne runden, he he.)

Vimpelproduksjon, gitt.

2010-07-01T18:36:00.001+02:00

Ja, så kom eg sannelig i gang. Haust har sydd vimpelrekke, og med det inspirert meg. I går kveld gjorde eg denne ferdig, ca 3 meter lang. Eg veit ikkje heilt kor eg skal ha rekka, så dette er berre eit prøveoppheng.

Vimplane går i blå, grønne og turkise tonar med stoff frå gamle retro dynetrekk og noko nyare stoff. Eit skjørt eg likte stoffet på fann eg på Fretex, og no er delar av det blitt til vimplar.

Kjekt! Eg trur eg må sy fleire. Det gjekk jo så greit, ikkje vanskeleg heller.

Sju TING

2010-06-30T11:26:00.008+02:00

Som eg nemnde her om dagen, så har også eg fått ein award, ein Beautiful Blogger Award frå Ingrid i den herlege friske Fjeldborgbloggen. Då er tanken at eg skal skrive litt om meg sjølv, sju ting faktisk.

Here is what you do when you get this award: 

- link to the person who gave you the award 

- share 7 things about yourself 

- give the award to 7 other bloggers

Og når me snakkar om ting, passar det utmerka å seie litt om det språklege først:

1. Sidan eg er norsklærar, er eg oppteken av språk. Eg formanar alltid elevane mine om ALDRI å skrive ordet ting fordi det er innhaldslaust. Eg pirkar og rettar og styrer i veg. Men i fritida mi kjenner eg ei barnleg glede ved å ikkje bry meg, ved rett å slett å miniprotestere litt mot mine eigne kjepphestar. Eg er sær nok til å bli yr av å la vere å rette e-verb og a-verb hos meg sjølv her på bloggen.

Gleda kjem også til uttrykk i små detaljar som her:

Denne blomsterpotta står i entréen her heime, og eg legg rett og slett ting i henne. Det er alt og ingenting. Førebels ligg ein liten plastelefant som jentene innimellom leikar litt med.

2. Eg har alltid vore ei kontorrotte. Med det meiner eg at eg i heile barndommen har kjent ei lengt etter kontorstol med hjul på, blyantar og viskelær, tavler, papirblokker og anna skulemateriell. Eg har kjent ekstase når eg har fått slikt. Då eg for eit år sidan tok kontakt med driftsleiaren på skulen vår og spurde om han hadde nokre tavlerestar til overs, og han kunne fortelje at han hadde ei diger heil tavle som skulle kastast, så forstår de at eg var i himmlen. Eg fekk med meg heile sulamitten, og no har jentene store tavler på romma sine, eg har ein stor tavledel ståande i garasjen som eg kanskje dreg med meg til hyttehuset.

På biletet under her kan de se at den nyinnkjøpte kontortingen Dymo frå Clas Olsson gir stor lukke! Namn og etikettar er kjekt!

3. Eg jobbar som de forstår som lærar, og det er på vidaregåande skule i faga norsk og historie.

4. Eg er sjenert. Ja, det kan ein kanskje undre seg litt over når ein jobbar med mange menneske kvar dag, men somme tider kjenner eg på eit behov for å halde meg for meg sjølv og verne om mitt. Kanskje det rett og slett er ein konsekvens av arbeidet mitt? Derfor synest eg det er litt skummelt å leggje ut stoff her på bloggen.

5. Eg er ein rotekopp. Her i huset er det sjeldan heilt ryddig, men eg klarer fint å leve med det. I entréen har me som de ser, ei gummikorg som ungane hiv skorne sine i når dei kjem inn. Denne ordninga kom etter at me hadde tråkka på skor i fleire år, he he. Ordninga fungerer fint, og eg blir glad når eg etter lang tid kjem fram til noko som virkar.

6. Eg liker hage. Me har jobba med hagen her i årevis og eg har eigen hageblogg.

7. Eg elskar å lese, men får alt for lita tid til det elles i året. Sommaren er derfor ei god tid for lesing. Men det så mykje anna eg også skulle ha gjort, så eg veit ikkje korleis det blir.

Så det var litt om meg.

Og så skal eg sende awarden vidare, og då blir eg litt sjenert, veit de. Det er slik at eg ikkje har så mange lesarar her, at eg veit dei fleste har hatt awarden tidlegare og at eg ikkje vil virke masande. Men no er det sagt, så dei eg no nemnar får ha det i bakhovudet...

Eg kunne tenkje meg å sende awarden vidare til:
Borgildpia, Haust, Hallingstad, Shinedesign, Ralfefarfars paradis, Dronning Maud og Lykke og Lykkeliten.

Ha ein fortsatt god dag!

Full fres!

2010-06-28T23:36:00.006+02:00

Ja her flyg dagane avgarde. Sommarferie og yre ungar krev sitt. Me har siste veka vore på sørlandet ( må koble av hyttearbeid med kos innimellom) med obligatoriske besøk i Dyreparken, Stoff og stil-butikken (eg vil gjerne ha den butikken til Rogaland!), og så har me daffa avgarde i Kristiansand. Der dukka den eine butikken etter den andre opp, og daffedagen enda med bæreposar og overfylt barnevogn.

Me var mellom anna innom butikken "Den blaa dør", og der var det nokre velkjende figurar som smelta ei fem år gammal jente sitt hjarte...

Det var dette sjarmerande huset som styrte handelen. Me kom ut av butikken med litt av kvart (komfyr, dokker, vogn og mus). Elles fekk heile familien gåver dei smilte av på turen.

Så har me vore i hyttehuset igjen. Der jobbar me på spreng. Denne helga var det golvet i allrommet som skulle slipast og få nokre strøk med lys beis.

Slipinga tok lenger tid enn me trudde, for store delar av golvet var sannsynlegvis prega av noko parafinsøl i oljekamin (dagtank med påfyll inne). Pusseskivene gjekk "tette" stadig vekk, men med tålmod og iver har mannen fått reinska opp og kome ned til reint tre.

Her ser de skilnadene...

Og her er kjøkkenet per no. Me har fjerna nedste hylle i overskapet for avstanden mellom det og benken var så liten. Eg vil ha lys lys lys. Og når ein forsøker seg på å rive ei plate utanpå eit kjøkkenskap, ligg det sjølvsagt nytt arbeid og ventar... Her dukka det opp sparkelarbeid med påfølgjande tørketid. Akk, ja. Ting tar tid. I morgon skal hyttemannen her dra avgarde igjen for å lakkere tregolvet. Det kjem til å bli steinbra. Eg kjenner det berre på meg!

I mellomtida skal eg vere heime og stelle i hus og hage. Det veks og gror her omkring ser de, hybelkaninar og ugras og slikt ;-) Og så har eg kjøpt meg turkis voksduk på Stoff og stil som eg skal pynte litt med. Gardinene til hyttehuset skulle eg også ha kome i gang med, og kanskje ein vimpel til toåringen sin bursdag i juli... Og så skal eg lese! Herlege tider!

(Sidan sist har eg fått ein kjekk award frå Fjeldborg, ein av favorittbloggarane mine. Eg skal seie sju ting om meg sjølv. Det kjem, det kjem. Tusen takk for awarden! Det var svært kjekt å få ein slik, spesielt når ein driv blogging i lite format, om eg kan kalle blogginga mi for det.)

Nyt sommaren!

Travle dagar

2010-06-17T20:44:00.000+02:00

Det er tid for bursdagar. Denne veka har jentene blitt invitert i sju (!) bursdagar. Tre av dei på same dagen betyr at to må droppast. Det går i kjolar, vask, stryking, hårstell, gåvekjøp og innpakking. Sjølv har eg hatt ei travel veke på jobben med munnlege eksamenar og heilspente elevar. Det er med andre ord hektiske tider med dagar som flyg.

Slik ser bordet ut her når det går i innpakking, kortlaging og når mor sjølv har snopt litt. Her ser de nemleg to kjøp eg har unna meg denne veka.

Desse tre skålene frå House Doctor kunne eg berre ikkje gå forbi. Eg fall pladask for dei då dei smilte til meg utanfor butikken i Sandnes i dag. Sommarlege med gammalt preg. Dei skal brukast flittig.

Og desse tre kom eg over på Fretexrunden min. Heller ikkje desse kunne eg la stå att i butikken. Dei to er lilla, litt mørke på biletet her, men nydeleg farge. Og den blå er fascinerande blå.

Ja ja, travelt, men kjekt.

No skal eg bruke resten på kvelden på å lese ferdig romanen som vann Nordisk Råds litteratupris, nemleg Sofi Oksanen si "Utrenskning". Fantastisk bok som eg anbefaler.

God kveld, og god bok!

Syriner og Knerten

2010-06-11T18:43:00.010+02:00

No er det definitivt syrintid. Treet i hagen blomstrar og spreier nydeleg blomsterlukt i hagen og stova.

Eg har henta inn massevis av syriner no, riktig frotsa. Det er jo så herleg å berre hente inn det ein vil ha. Og syriner er vel det eg har aller mest av.

Det er likevel ikkje berre syriner eg henta inn til helga. I dag blei det eit godt utval av Knertenar også. Jentene her i heimen har nemleg kalla venninnene inn til Knertenkino. Og då må sjølvsagt alle få kvar sin eigen Knerten.

Det var eg som måtte ut og leite etter Knertenfamilien i eit tre her omkring. Eg reinska vekk alt av grønt og passa på at kvar ein hadde armar og bein.

Stor stas!

Så no sit sju jenter foran tv-en her i stova og et popcorn og frukt medan Lillebror og Knerten held show for dei.

Ein kjekk aktivitet på ein fredag med regn.

God helg!

kvitt, kvitt, eggekvitt - og kanskje eit gardintips?

2010-06-09T22:43:00.002+02:00

Det blir kvitt i hyttehuset. Mektig kvitt rundt omkring.

Her er det barnerommet som er ferdig med mange lag maling her og der. Alt er kvitt. Einaste aberet er at dei ferdigmalte vindauga er eggekvite, og dei blir litt grå saman med det andre, men det får stå si prøve.

På barnerommet skal det komme fargar, altså. Mange friske fargar. Eg har kjøpt inn blomstrete gardinstoff, men har enno ikkje bestemt meg for korleis formen skal vere. Kanskje mi gode venninne Cecilie frå Gardintrylleriet (du må få heimesida di opp og gå!) kan komme med forslag? Ho er travelt oppteken med søm til mange heimar her i distriktet og er kjempeflink. Vel gjerne henne om de treng sømarbeid!

Og her er stova vår, eller del av allrommet som det no har blitt. Her ser det den grålege eggekvite døra mot det kvite. Eg trur eg må fram med malarkosten her. Golvet her skal ikkje bli kvitt, det skal beisast i lys lys farge og lakkast oppå.

Her er eg usikker på gardiner, men dei må vere florlette. Lift eller vanlege?

Og her er yndlingskroken. Her skal me ha spisebordet og slagbenken og nyte kveldslyset og utsikta mot grønt.

Himmel, eg gler meg til me kan ta det i bruk. Det nærmar seg...

Barnleg lukke

2010-06-05T22:42:00.003+02:00

Herleg helg med barn i heimen. Det er den enkle gleda som blir så stor.
I dag kom sjuåringen min heim med denne skjønne blomsterbuketten i hendene. Eg fór sporenstreks inn og henta vase og fekk dei i vatn.

Hengande blomster fekk nytt liv igjen, heldigvis.

Og så er det ei anna herleg greie med barna, nemleg rastlausheita. Her er det minstemor på 1,8 (snart to altså), som ser barnetv og slikkar i seg noko søtt.

Om det er det søte som gjer seg utslag i høgare aktivitet eller om det er barnetv som ikkje fangar hennar interesse skikkeleg, er usikkert, men ho heiv seg ut i spontan dans under barnetv.

Og blei kalla tilbake av lokkande tv-stemmar. Full fart fram og tilbake.

Slike augneblinkar sit mora berre og nyt frå sofaen.

Håpar de også nyt gode augneblinkar.

God helg!

Kart og plansjar på Finn

2010-05-31T22:19:00.004+02:00

Eg vil berre tipse om sal av kart og plansjar på Finn. Sjølv har eg vore så heldig å få kjøpe dette verdskartet her.

Klikkar du deg inn her, vil du finne annonsa som har noko eg trur ein del bloggarar kanskje kunne tenkje seg.

Eg anar ikkje noko om kva som er solgt, men annonsa blei lagt ut i går. Det beste av alt, er at pengene går til fattige barn i Bolivia. Det er ein skule rett utanfor Stavanger som ryddar i kjellaren sin som har kome på den gode ideen.

Mannen min og eg var i Bolivia for omtrent ti år sidan no, og der besøkte me mellom anna ein barneheim. Det gjorde eit enormt sterkt inntrykk å sjå korleis desse borna hadde det, men også kor fantastisk arbeid folk gjer i høve til dei fattige.

Så mitt kjøp at dette kartet gir glede til fleire enn berre meg, og det kjennes utruleg godt.

Inspirasjonsblogg

2010-05-30T23:33:00.006+02:00

Eg dristar meg til å leggje inn nokre bilete som eg berre fulldiggar. Dei er Maria Sandberg frå bloggen Lilla Villa Vita sine. Hennar blogg er rein inspirasjon med tanke på hyttehuset vårt. Eg storkosar meg med tekst og bilete der.

Ei slik kontornisje skulle eg gjerne hatt...

Det er noko enkelt og naivistisk over stemninga som eg liker så godt.

Sjekk sjarmen i dette biletet her då.

Og så har eg så lyst på ein port inn til hagen

Eg trur eg har tusen draumar.

Dongeriinspirert

2010-05-26T20:26:00.001+02:00

Eg har fått det føre meg å sy av gamle dongeribukser. Me har dongeriklede liggjande i opptil fleire skap her heime, og nokre av dei har eg så gode minne frå. Det gjeld spesielt jentene sine. Når minstemor no veks ifrå dongeribukser og kjolar som alle tre jentene har hatt, er det ei trøyst å kunne nytte minnene frå det plagget i noko som har lengre varigheit enn klede.

Derfor klippar eg no opp rester. Eg skal sy nokre puter til å ha ute i sommar.

Men som ein første test, har Formfulle Frida kome til oss.

Ho er inspirert av danske Susann Liebe sine ender. Og her i huset slo ho an straks. Alle jentene har klemt på henne og leika med det store nebbet og dei digre føtene. Under nebbet er ei lomme som dei to eldste jentene har hatt mange småsteinar oppi. Herleg å tenkje på det no.

Det må nok bli fleire dongerisøsken etterkvart.

Me berre maler, me

2010-05-25T23:20:00.004+02:00

Ja, det er det det går i for tida. Me drar til hyttehuset så snart anledninga byr seg. Det er framleis laaangt igjen, men det går no framover. Her er soverommet vårt, snart ferdig. Bonden utfører dei siste malingsstrøka på golvet.

Me skal ha kvite golv i 2. etasje.

Så er barnerommet gjort i stand (fjerna tapet, sparkla ein million spikerhol, pussa sparkelet) til fleire arbeidsøkter; kvistlakk, grunning med sperring! (ja, me fekk feil grunning til soverommet vårt og malte og malte utan at det blei kvitt) og til sist kvit veggmaling, på golvet; pussing, vasking, kvistlakk og golvmaling.

Nede i 1. etasje har me no fjerna veggen inn til kjøkkenet, så det skal bli eit triveleg allrom. Stova er todelt, så dette er berre eine delen. På kjøkkenveggen prøver eg meg med kvitlasering for at ikkje alt skal bli heilt kvitt, men eg er ikkje overtydd om at det blir bra til sist. Det er uansett inga sak å male det kvitt om eg heller vil det.

Så slik går no dagane. Eg er såå klar for ferie no, men må halde ut nokre veker til.

Treng litt hjelp her (WLW og bloggroll)

2010-05-25T22:00:00.001+02:00

Eg har nett prøvd ut Windows Live Writer, men forstår ikkje det der med bloggrollane, sjå innlegget nedanfor som er skrive i WLW og som ikkje kjem opp i nokre rollar...

Kan nokon kyndige hjelpe meg?

Prøver ut større bilete i bloggen her…

2010-05-25T21:19:00.001+02:00

Eg er treg med endringar, men no forsøker eg meg på å skrive i WLW.

Her er spisestova vår etter at eg sette inn andre stolar for å gjere ho meir sprek. Eg kom nemleg over den svarte stolen til høgre på Fretex (40 kr), og elskar han allereie. Det stod tre av dei på butikken, men dei andre to var stygge av rifter og malingsflekkar. Eg skulle likevel gjerne hatt fleire. Gode å sitje i, og tøffe å sjå på.

Og så er det dette med å få bilete opp i bloggrollane. Eg har lese gjennom Stine si forklaring, men får det ikkje til… Skal eg altså gå inn og laste opp eit bilete på vanleg vis for så å gå inn og fullføre innlegget? Viss nokon kan hjelpe meg her, så blir eg svært glad.

Elefantar og hyttehus

2010-05-09T21:31:00.016+02:00

Det har vore ei kjekk helg for oss. Me har hatt koseleg lag med venner og familie, eg har fått hilse på den trivelege og gode feen, og me har fått ein straum av elefantar i hus.

Sjå desse HERLEGE her som eg har kjøpt av den gode feen, Linda. Dei er berre såå sjarmerande, og eg blir så glad av å sjå på dei.

Her snik ei jente seg framfor linsa for å forstyrre mora som er så fascinert av desse underlege dyra. Det har blitt sport her hos oss nemleg, det å forsøke å vere linselus på alle bileta eg tar. Eg må skunde meg å ta bilete før lusa kjem vandrande, hoppande eller snikande. Men det er no berre kjekt, det.

Og ein annan kjekk sak som låg med var desse skjønne retrostoffa. Gjett om dei skal gjerast om til noko kjekt. Tusen takk!

Så var det Hr Elefant himself. Eg hugsa ikkje kva det opprinnelege namnet hans var, så han får no vere nøgd med det namnet førebels.

Eg synest han passar godt til den lille pulten i fargen isvann som me har i stova, eller sekretæren, som mor mi seier.

Tusen takk for handelen!

...

I dag har me vore i hyttehuset vårt. Det går sakte framover, men eg kjenner meg stadig meir rastlaus no som sommaren nærmar seg.

Ovanfor her er inngangspartiet. Ny dør kjem snart, og så skal me med tida lage ein uteplass her, for kveldssola held seg lenge på denne sida av huset.

Her er kjøkkenet... Veit ikkje om eg treng seie noko meir.

Eg er usikker på om eg skal fjerne dei kvite hyllene her og berre setje opp enkle eller om eg skal ha heile stase. Det må iallefall bli kvitmalt. No er det lys blått. Skapa skal også bli kvite. Eg diggar no Fjeldborg sitt svarte kjøkken også, så eg skal halde mulegheita open.

Og her er veggen inn til kjøkkenet frå stova. Han går sine siste dagar i møte no, for han skal vekk. Me skal opne opp og få eit allrom. Det blir stas, veit de.

Åh, eg lengtar så. Men kvart skritt, er eit steg nærmare målet.

Ha ei god veke alle saman.

Her blir det stilretting til den store gullmedalja. Eksamen nærmar seg for dei som for tida spring rundt i russeklede og sit under pultane sine i timen. Det er no ei fantastisk verd, ikkje sant? Mangfald og tid for alt.

Leikehytte del 2

2010-05-05T23:17:00.007+02:00

Det har ikkje blitt store framskritta i leikehytta denne veka. Framleis står nokre prosjekt for tur, men det er så mykje som står i kø. Derfor blir det bilete slik det er no.

Her er altså "stova". Sofaen er ein slitt benk frå barnehagen til jentene her. Han skulle kastast, men eg nekta å la det skje. Me har malt han i ein lillafarge jentene valte. Litt knall kanskje, men dette er deira hytte med mamma si velsigning (og godkjenning ;-) ). Bordet er frå Fretex, og tanken er at eg skal male det kvitt, men det er no ikkje så verst heller då. Putene over sofaen er sydd av gamle dynetrekk, og det er forskjellig stoff på kvar side slik at jentene kan forandre om dei vil det. Eg har valt å hengje dei opp med innsydd strikk i nokre krokar på veggen (ikkje kjempefint, men praktisk!). Då er dei på plassen sin og held seg reine lenger. Tinga her i heimen har nemleg ein tendens til å flytte på seg relativt ofte.

Her er ein annan vri. Putene har fått ny side fram og madrassen på benken er vekke. Putene heng kanskje litt høgt no, men dei er jo tilpassa madrassen. Den har eg sydd eit trekk av ein gammal voksduk til slik at han kan vaskast. Under benken har jentene kvar sin leikekasse.

Gardinene til dette vinduet skal skiftast ut med ei fransk som eg omtala i førre innlegg. Og gardina skal vere i stoffet på den midterste puta på benken ovanfor. Det er eit kompromiss mellom jentene her. Den eine fekk velje til kjøkkenet, den andre til stova.

Og på bordet har dei laga dagens salat; graslauk og gras, fint hakka opp og fordelt i skåler.

Bon appetit.

Leikehytte del 1

2010-05-02T21:38:00.009+02:00

Me har den siste tida jobba ein del med jentene si leikehytte i hagen. Det er kjekt når me omsider er i gang, men det har tatt si tid å kome i gang, det må eg vel innrømme.

Det heile starta no i vår med at me endeleg fekk sett inn og malt eit ekstra vindauge (eg fann eit billig og malingsslitt, men heilt, på Finn). Hytta hadde frå før eitt vindauge, men det vendte mot aust, og dermed kom det aldri noko triveleg lys inn i hytta. Det nye vindauget vender mot vest og er langt meir triveleg. Og det var vel det som var katalysatoren for oppussingsarbeidet.

Iallefall fekk me i sving fleire av dei ventande prosjekta. Pappaen snekra til denne kjøkkenbenken (inspirert av Bo med barn) og laga hol til ei stålbolle eg har hatt lenge og som har blitt ganske sliten og ripete på innsida. Kjempefin til vask. Så fekk eg mormor til å sy gardiner og kappe samt gryteklutar av sengetøystoffet eg kjøpte i København i haust.

Jentene må visst ha kvar sin oppvaskkost, det blir problem med berre ein (rart det aldri skjer inne på kjøkkenet vårt).

Bakom gardinet under benken er det ei eikstra hylle, og der står smågrytene og litt anna kjøkkenutstyr små jenter treng i ein hektisk dokkekvardag.

Så fekk me malt det lille vitrineskapet eg kjøpte billig på Fretex i haust. Jentene ville ha noko lilla til bakvegg, og då hadde eg liggjande eit papir som passa godt. Dei er lilla-fan for tida. Lilla er heilmaks.

Inni dette vitrineskapet sette eg fine plaststetteglas frå Ikea og noko koppestell dei har fått tidlegare. Dermed blei det eit kjekt kjøkkenskap for finare ting enn gryter.

Slik er altså kjøkkenet i hytta no. Ei påskelilje pyntar benken. Den er frå ei av jentene sine venninner sin hage. Ho kom med kvar si lilje til jentene her ein dag. Skjøne vener!

Elles held eg på å få i stand ei fransk gardin (også inspirert og med oppskrift frå Bo med barn) til det andre vindauget. Eit bord bør bli malt osb.

Eg kjem tilbake med meir frå leikehytta om litt. Imens er ho i full bruk kvar dag, dokkene her i heimen har fått eit nytt liv og ein ny heim. Eg sit berre og nyt synet av småjenter som leikar vaksne.

Blir hyttehuset nokon gong ferdig?

2010-04-24T23:40:00.005+02:00

Ja, ein kan jo stille seg det spørsmålet.

Sjløvsagt blir det ferdig, men det er så laaangt fram. Og førebels er det slik at det er mannen min og faren hans som gjer det meste. Det er ikkje lett å dra med seg tre små inn i dette kaoset.

Eg gler meg til det meste her blir kvitt (lurar også litt på nokonlunde kvit interiørbeis) og reint og triveleg. Men har eit mål om at det skal bli det til sommaren.

Men då må folk hengje i...
Handverkarar som rørleggarar og elektrikarar tek si tid før dei gidd ta ein tur innom.

Svigerfar tek likevel gjerne turen. Han er vel den som ivrar mest, tenkjer eg. Og kjekt er jo det. Her er han i aksjon på soverommet. Sjekk den råtne døra... Ho har nett blitt skifta no.

Det blir nok bra til sist.

Kaffi i sola

2010-04-20T21:13:00.004+02:00

Det er så herleg når sola stikk innom med varme stråler på ellers vindfulle dagar. Me har nokre lune krokar i hagen vår som blir brukt flittig.

På slike kalde, men lune dagar, er det herleg med ein kopp kaffi i stolen ute. Eg var innom på Ikea forrige veke og fekk med meg eit dusin av desse krusa her på tilbod til 5 kroner pr. stk. Eg treng eigentleg ikkje tolv, men sidan Ikea hadde sett ei maksgrense, så måtte eg liksom kjøpe maks. Det var jo ikkje mange kronene, likevel.

Lyserosa krus hadde eg vel strengt tatt ikkje trudd eg ville ha, men eg elskar fargen mest av alt. Bleikrosa er nydeleg. Eg er vel på veg tilbake til 80-tals forelskinga i pastellar...

Uansett kor retninga går med tanke på både det eine og andre, eg grip dagen når han inviterer meg ut.

minnebrikke og leikehytte

2010-04-15T21:33:00.005+02:00

Eg har ei lita tulle her heime som har ei hang til å trekke til seg alt som er smått. Miniatyrar er fantastiske for henne, og tenderar mot å bli ei mare for oss vaksne. Her ein dag lot faren henne få leike med minnebrikka i kameraet...
Og dermed har eg ikkje høve til å ta bilete, for den lille brikka kan liggje i alle skuffer eller skap, i sengebotnar og støvlar. Ho veit kanskje kor, men ho likar å vere interessant og held derfor gjerne på ei spenning. Ho er i det minste kreativ...

I dag då ho og systera leika i leikehytta si, sa ho: "Sjå kor fint mamma og pappa har gjort det til oss her!"

For me held på med leikehytta no, ein barnehagebenk er malt lilla, retroputer er sydde og nytt vindauge sett inn. Eg fekk med meg eit sjarmerande lite bord frå Fretex i dag samt ein postkasse i tre som skal malast. Eit par tallerkenhyller blei det også. Så skal me lage oppvaskbenk, sy gardiner og plante i blomsterkassa.

Det var berre den minnebrikka då...

Litt hjelp frå deg?

2010-04-13T23:35:00.003+02:00

Utanpå hyttehuset (sjå bilete under) skal det kome ein altan som går nesten langs heile veggen. Eg undrar litt på om eg skal ha svart rekkverk på han. Hyttehuset skal etter planen bli kvitt. Eg veit ikkje om dette blir rart... Nokon som meiner noko om det?

Elles er eg på jakt etter eit rekkverk som kan passe... Førebels heller eg til ståande fjøler (kva heiter det eigentleg) med kraftige kvadratiske bjelkar/stolpar/stenderar imelom.

Framgang

2010-04-11T22:42:00.003+02:00

Det er tynt med innlegg her for tida.
Men her er no eit bilete som viser arbeidet med hyttehuset vårt. Ny altandør er på plass, så no blir stova innanfor lysare. Eg gler meg til me kan svinge malarkostar og gyve laus på det som viser igjen, he he.

Vel, i dag har eg med god hjelp frå mora mi sydd heile 9 puter, store og små som skal vere både i hyttehuset og i leikehytta til jentene her heime. Me held forresten på med ei oppussing av leikehytta. Det kjem eit innlegg om resultatet derifrå når meir er på plass. Me har ein bursdag som deadline, me jobbar nok best under press her hos oss.

Nydeleg helg, forresten. Me har vore mykje ute, eg har til og med fått litt farge. Herleg. Meir meir meir!

Håpar på ei fin veke også.

Snopeegg i eggboks

2010-04-04T12:38:00.005+02:00

1. påskedag startar roleg med barnetv i opptil fleire timar. Det er ein langsam start på dagen. Langsam og god.

Det er herleg å sløve skikkelg på ein dag som denne. Sofaen i tvkroken er flittig i bruk med både teppe, lammeskinn og godteri på bordet. Og denne påsken har eldstejenta i fyrste klasse kome heim med denne nye eggboksen som ho har laga på sfo.

Eg har fått ei omstendeleg forklaring på korleis han er laga, og eggmotivet på er klippa ut frå ein serviett og limt på.

Så no har me fått ein ny boks og dermed kanskje ein liten ny tradisjon. Snopeegg på morgonen 1. påskedag i eggboksen...

Eg synest det er så herleg å skape nye og enkle tradisjonar som kanskje kan gi vakre minne for nokre jenter når dei blir vaksne.

Ha ein god søndag!

Påske (kreativt, ikkje sant?)

2010-04-03T20:04:00.008+02:00

No har det blitt påske her også.
Så langt i ferien har me malt fleire møbler, renska opp i hagen og er no berre orientert mot nyting. Vel, heilt slik blir det ikkje, for med hyttehuset ventande, blir det reiser att og fram. Det er langt igjen, men det blir bra til slutt. Ingenting å blogge om derifrå enno, eg reknar med at støv og rot ikkje er så spennande...

No kosar me oss heller med påske i ein litt meir støvfattig (men ikkje støvfri!) heim.

Desse kvistene er gyvel som snart spring ut med gule blomar. Eg diggar gult og turkis.

Og her er eit utsprunge eksemplar av gyvelen. Skikkelege påskekvister det der.

Og her er altså benken i tv-stova vår...

...klar til påskekos med brownies og appelsiner.

Fortsatt god påske!

Gi-vekk-konkurranse

2010-03-14T12:30:00.006+01:00

hos favorittbloggen min...

Ta ein kikk på ein fargerik og vidunderleg blogg som inspirerer meg voldsomt.

Eg kunne ha flytta rett inn i den heimen!

Laurdagssysler

2010-03-06T18:45:00.004+01:00

I morges fekk eg det føre meg at viss eg ikkje fekk ordna settekassa relativt raskt, så blei ho berre ståande og etterkvart sett vekk. Dermed blei det hobbykos for alle jentene her ved spisebordet på morgonkvisten. Jentene har fått seg krympeplast som dei er heilt hekta på. Dei teiknar og steikar og får deretter små harde plastfigurar som dei sjølv har dekorert. Eg heiv meg over klipp-og-lim-arbeidet, og det blei ein herleg start på laurdagen her.

På laurdagane elskar eg å kunne stille ungane spørsmålsformuleringa:
- Ja vel, jenter, me har heile dagen i dag, kva skal me bruke han til?
Dei plar tenkje seg om ei stund, nokre gonger vil dei gå på forteljarstund. Det er eit herleg tilbod som barn frå fire år i Stavanger får gratis. Profesjonelle forteljarar fortel eit par eventyr dei plukkar fram frå ein koffert som skal ha reist verda rundt. Knallkjekt! Andre gonger vil dei vere heime og leike med kvarandre, då kler dei seg ut med vesker, sko, skjørt, skjerf og solbriller og leikar vaksne. Eit herleg syn. Nokre gonger vil dei berre sjå på tv, mens i dag ville dei (med litt vaksenstyring) at me alle skulle gå på Vitenfabrikken.

Og dermed blei det slik. Me har ikkje vore der før, men det var ein spanande plass å vere. Teknologien forstår dei ikkje så mykje av, men tilboda strekk seg langt ut over det. Det som vel traff familien best, var den lille øvelsen to stk. kunne ta der hjerneaktiviteten blei registrert og der det handla om å slappe mest av. Eg blei overlegent slått av mannen i heimen (og han fekk derfor ei bekrefta forklaring på mykje, he he), dei små jentene slo deretter oss vaksne overlegent. Det måtte skikkeleg konsentrasjon til, og det var herleg å sjå at ungane hadde så lett for å slappe av. Me skulle nok ha lært meir av dei der, trur eg. Iallefall me kvinner, tenkjer eg ;-)

Eg fekk også lure til meg ein liten Fretextur, og sjølv om det ikkje var så mykje nytt i butikken, kom eg over desse gamle handarbeidsblada. Kanskje eg finn noko som gir meg ei herleg, tankefri og avslappande stund der?

No er det iallefall seinhelg, og den skal berre nytast.
Ha ein god kveld.

Nei, det er ikkje påske enno

2010-03-04T17:38:00.013+01:00

Ein skulle tru eg hadde pynta stova til påske her...

Men det er ikkje tilfellet, eg har berre vore på Fretx, igjen. Det blir litt mykje Fretex når ein har fridagar innimellom. Men eg nyt det jo.

I dag kjøpte eg med meg desse endene, og eg veit ikkje om eg synest dei er litt harry eller om dei fungerer godt. Eg heller til det siste.

Her er dagens fangst (solbrillene frå H&M er inkludert, for små jenter som gjerne vil gjere likt mora si må jo også få solbriller). Eg måtte stikke innom ein hobbybutikk etter Fretexbesøket for å gjere fangsten komplett. Saken er nemleg den at eg kom over ei settekasse, og det har eg hatt lyst på så lenge. Og dermed måtte eg jo kjøpe med meg papir og lim til å tapetsere med.

Settekassa har ei glassdør foran, og det passar meg fint sidan eg er rimeleg tolerant i høve til støv i heimen. Tinga kan med andre ord få vere støvfrie lenger.

Her er papiret eg kjøpte, og det fine er at det er tosidig slik at det er eit anna mønster på baksida. Genialt! Eg har også noko papir frå Rice liggjande, så no skal settekassa få kulør.

Og så ramla eg over dette blå stoffet som eg likar så godt. Eg hugsar dette mønsteret frå barndomen, anten seint syttital eller tidleg åtti. For ikkje så lengje sidan kjøpte eg ein brun boks med dette mønsteret også, så eg får litt hjartebank når eg kjem over mønsteret. Blåfargen her er nydeleg.

Så no er det nok å gjere her. Eigentleg alt for mykje, men det motsette må vere verre, ikkje sant?

lys

2010-03-02T18:09:00.004+01:00

No i skumringa kjenner eg ei ekstra glede over kvitt spisebord. Det er kanskje kjedeleg å høyre om slikt, men eg nyt lyset i bordet og den lysare kvelden i lange drag. Lyset får jo kvelden til å vare lenger og bordet får tinga betre fram.

Her er spisestova mi då, med nytt bord og ny lampe og nytt "medisinskap" som fungerer som fyrstikk- og telyshus.

Eg måtte forresten bytte lampa for det blei for mykje lys med glasskuppelen. Eg likar når lyset blir styrt litt. Det blei betre med ein tett metallskjerm.

No er det kveld igjen, gitt.

Kvitt bord og ny inspirasjon

2010-02-28T17:51:00.006+01:00

Endeleg er spisebordet mitt ferdig. Det har fått god tid til å tørke og er no klart for bruk. Og det er ei rar kjensle å ha kvitt bord når ein ikkje har hatt det. Det er så lyst og herleg og andre fargar kjem ekstra godt fram.

Ja, eg måtte dra fram minstejenta sitt dynetrekk her for eg synest det er så herleg med dei sterke fargane og sjarmerande epla. Det er ikkje sikkert det får vere dynetrekk meir, eg trur eg må lage noko av det.

Eg har lyst å prøve å sy meg eit lappeteppe etter inspirasjon frå sååå mange bloggarar her, men er noko usikker på korleis eg gjer det. Syr ein saman mange ruter i ein strimmel for så å sy saman alle strimlane til slutt? Noko spesielt å ta omsyn til? Dersom nokon har gode tips eller lenker til tips, tek eg gjerne imot.

Liljer

2010-02-27T14:00:00.004+01:00

I går fekk eg nokre liljer inn i heimen min. Det er ikkje mykje stas over dei i knopp, synest eg.

Dei får imidlertid ei kraftig forbetring når dei opnar opp for skatten innanfor:

Førebels er det berre denne eine blomen som har opna seg, men det står fleire i kø. Og dei opnar seg nok snart og spreier nydeleg liljeduft i heimen.

Eg lengtar mot vår!

To Fretexkupp denne veka

2010-02-26T15:36:00.010+01:00

To herlege Fretexkupp denne veka:

Denne Wiinbladkoppen stod gjemt godt innimellom mange firmakoppar og anna grums på Fretex. Tenk for ein skatt å finne der til 25 kroner. Ein februarkopp i februar, maskemånaden.

Og så var det dette medisinskapet som også stod gjemt i ein krok, 25 kroner det også. Eg hadde tenkt å spraye det svart, men bonden her meinte det var fint som det var, og eg er eining. Det hadde kanskje blitt litt for mykje svart.

Og av alle ting, så har medisinskapet fått plass i stova heime... Inni der har eg fyrstikker og små ting små ungar ikkje skal leike med.

Så då blei det ein "ny" krok i stova. (Eg måtte bytte ut koppen med eit lite lys då, for på kvelden er det litt mørkt her.

No driv eg forresten og grublar på kva golv me skal ha i hyttehuset, male tregolvet kvitt, eller lasere det lyst. Det er sååå mange lekre bilete av kvite golv, men alt støv og slikt viser så fort då. Og så er det jo fint med lyst tregolv også. Ikkje lett med alle desse vala.

God fredag!

Kjøkkenkos

2010-02-23T20:19:00.006+01:00

Me nyt vinterferien i lange drag her heime. Ingen planar og ikkje noko kav. Herleg.
I dag har jentene bakt kanelboller og fått gjere som dei ville. Det blei store og små med maassse sukker på.

Og så har eg bestilt ein fluesopp av eldstejenta som fekk kitt til bursdagen sin. Ho tok oppgåva seriøst og leverte varer som bestilt.

Er han ikkje søt?

Så har me teikna og tusja flotte teikningar.

Tusjane har fått plass på kjøkkenhylla saman med sukkerkona. Ingen vond plassering.

At soppen er plassert ved sidan av peppermøa er reint tilfeldig og har ikkje ei djupare forklaring. Men han må få vere saman med oss når me kosar oss rundt kjøkkenbordet.

Scenar frå eit frokostbord

2010-02-23T10:54:00.011+01:00

Det er vinterferie, pappa er i hyttehuset og jentene kosar seg heime. Ingen skal avgarde tidleg på morgonen, pysjamasane er på til langt på dag og det er avslappande kos i heimen. Dermed knipsar eg i vei, eg knipsar alt og ingenting, heilt planlaust.

Her kosar eg meg med ein kopp te. Nydeleg, ikkje sant?
Vel, saken er den at me er tomme for kaffi, og eg som elskar kaffi... Ei påskehøne bøtar litt på sorga over manglande kaffi. Denne kjøpte eg nett fordi den eg hadde tidlegare har gått i stykker, og eg likte ho så godt.

Det er forresten alltid interessant, synest eg, å studere bilete på bloggar rundt omkring for å sjå heilskapar. Det finst så mange lekre bilete med nydelege bakgrunnar og harmoni. Hos meg er det ikkje heilt slik, eg er ikkje flink til det. Tekoppen min og høna er rett og slett to figurar på eit frokostbord i ein vinterfeire...

Eg har kjøpt med nokre store, herlege Norgesglass på Fretex nyleg, og eitt av dei inneheld no frokostblandinga jentene her elskar å ha i yoghurt.

Litt meir stas enn Coop sin pose.

Den ekte og herlege stemninga består imidlertid av noko heilt anna. Då eplene kom på bordet var det nemleg nokre små barnehender på eitt og eit halvt år som raskt heiv seg oppi skåla...

Nyt ferien!

No malar eg

2010-02-22T21:59:00.005+01:00

spisebordet kvitt. Og det kjennest herleg. Eg er rett og slett gørr lei av den folierte bjørkeplata med grått mellomparti når ein slår det ut. No vil eg ha alt kvitt.

Og det var no nettopp at eg fekk det føre meg. Husbonden er sendt til hyttehuset for å jobbe der, ta imot rørleggar etc., medan eg er heime og passar barn. Vel, no var dei i seng og dermed gøyv eg laus med heftgrunning.

I morgon kveld og den etter det blir det kvit bengalakk, og så er det antakeleg ferdig.

Kanskje litt rart å tenkje at eg malar bord med barn i hus, men me har eit godt ventilasjonssystem og god varme, så malingsporene lukkar seg raskt. Det går bra. Og så har me god grunn til å kome oss ut på noko i morgon...

arbeid vs. pynt

2010-02-20T19:59:00.003+01:00

Saktens skulle eg ha gitt mykje for å vere ferdig med ein del skikkeleg traurig arbeid.

Eg er gladast i pynten, eg.

Arbeid pågår...

2010-02-19T23:34:00.008+01:00

Her kjem ei helsing frå hyttehuset, det eigentlege huset som denne bloggen opprinneleg var meint å skulle handle om...

Det er framleis kvitt ute, men lyset gjer seg stadig meir gjeldande, og eg elskar det.

Arbeidet er i gang. Veggar blir reinska for gamalt tapet, spikarar fjerna (med vonde hender som resultat), ledningar rivne vekk osb. No skal dei gamle veggane fram, og dei er forbausande flotte. Det er ikkje mange fuktflekkane der, nei. Nesten synd å seie eg skal male over dei, men dei skal altså bli kvite. Eg må ha lys!

Arbeidet er enormt, og eg trur det er best å ikkje tenkje på det. Akkurat no sit me og planlegg korleis eit knøttlite bad skal vere. Eg vil helst ikkje ha belegg på veggar og golv for det er så sjellaust, men så er det pris og fuktsikkerheit då... Eg vil helst ha den gamle treveggen på badet som ei gammal tante i si tid har malt knall rosa, men så er det krava i dag, då... Det finst vel maling som kan halde fukt vekke på treveggar også... Hm, ikkje lett. Og golvet då, kva skal me ha der?

Slik driv me på no.

Her er eit bilete frå før me byrja rive...

Ved dette bordet skal eg om nokre månader (eg er optimist) sitje og nyte kaffien min på slagbenken saman med retroputer og leikande born i retrokjolar...

Ha ha, eg trur at tida er det einaste eg har nok av, eg skal vel få merke meg kor inderleg feil eg tar.

Men er ein optimist kan det jo gå...

Litt natur inn

2010-02-14T21:45:00.008+01:00

I dag er dagen for herming, eller inspirerte handlingar, som eg vel å kalle det. Først bakte eg Kvirrevitts knekkebrød (omtalt i forrige innlegg), og så kikka eg på Borghild sin blogg der ho har bilete av Fiduciavasen sin med kvister oppi. Det innlegget fekk meg til å tenkje på Fiduciavasen min som har stått alt for lenge i et skap i vinter. Eg ville herme!

Og dermed fór eg ut for å plukke inn nokre bjørkekvister som eg plasserte i vasen saman med nokre lys. I anledning morsdagen og fastelaven, la eg på ein kvit duk på bordet. Eg ønskjer meg kvitt bord, så dette blei ein test. Ønsket om kvitt bord blei forsterka.

Eg likar best bord utan duk, så malarkosten må fram snart.

Sidan eg tok godt føre meg av kvister i dag, plasserte eg også ein diger bunt i ein vase ved tv- og strikkekroken min.

(Dårleg syn eller dårleg bilete? Det siste, ja. Eg måtte bruke blitz, for det er litt lite dagslys i denne kroken.)

Kvistene får stå så lenge eg gidd. Det er ei så herleg tid vi går imøte no som våren snart bankar på. Tenk kor herleg det er å berre tusle ut i hagen og plukke inn den eine blomen skjønare enn den andre. Eg gler meg vilt.

I dag var berre første skrittet.

Morsdag og fastelaven i dag - mmm

2010-02-14T13:21:00.004+01:00

No står ferdigstekte lunkne boller både med eggekrem og utan (til fløytekrem) på kjøkkenbordet, Kvirrevitts knekkebrød i steikeovnen, minsten søv og mannen og dei to største jentene er ute og skøytar. Kameraet er på skøytebanen, naturlegvis. Eg dillar heime, ryddar, lagar mat og førebur bollebesøk i ettermiddag.

Dagen starta med viltre ungar opp i senga mi, pakkar i fjeset og stor glede. Pakkane inneheldt ein god handkrem frå Body Shop, Karl Ove Knausgård si bok 1 (eg må lese henne for å få med meg kva den store debatten går ut på) og ei flott lita notatbok innbunden i skinn. Alt for mykje! Og det største - eit kort med rosa og raudt heimeteikna hjarte med ein god varm tekst frå sjuåringen.

Lukka er ordlaus.

Ha ein god dag alle!

----

Litt seinare:
No har eg svidd to av dei tre bretta med knekkebrød, så no er det god brent lukt i huset. Det fyrste brettet blei vellukka, men då eg heiv inni to brett på ein gong og varmluft på, blei det for mykje. Iallefall skulle tida ha vore korta ned. Men no veit eg det.
Dei vellukka knekkebrøda smakte himmelsk! Så knekkebrødbakst må eg berre skrive opp på obligatoriske gjeremål-lista.

O du herlege laurdag med sol, stol og masse tid.

2010-02-13T09:37:00.009+01:00

Kan ein laurdag starte betre enn med sol som snik seg inn stuevinduet og smilar til alle der?
Ikkje her i heimen. Her vaknar store og små til liv når sola smilar til dei og varmar trøtte sovekinn med litt energi.

Ein slik morgon er det i dag. Og det kjennest som stor lukke å kunne sitje her og vite at dagen med stor sannsynlegeheit kjem til å bli god. Me har eit par prosjekt for dagen, og så skal han ende i langsom kos mot kveldinga.

I går kom møblene eg hadde bestilt tidleg i januar endeleg. Til trass for at eg nesten ikkje vågar seie at ting kan gje lukke, så må eg jo ærleg innrømme at stundom gjer dei det.
Når Eamesstolen inntok stua, skifta ho med eitt litt karakter, og det er herleg med forandring. Nokre bilete på veggane skal flytte plass osb., men slikt er jo berre kjekt.

Han er fantastisk å sitje i.

Og mannen her går og nyt dei reine linjene i han. Eg óg, altså.

Og så gler eg meg voldsomt til ettermiddagsprosjektet:

Caravaggioen er rett og slett rå. Eg valte glasvarianten for den gir meir lys. Han er ganske diger, så det skal bli rart å djå korleis han tek seg ut over spisestova (som eg rett og slett må male kvit no, det meste skiftar farge her for tida).

Men no først skal me alle på bytur og kose oss på våre måtar, eventyrstund for dei små, litt snop for mamma på Kremmerhuset og ein god kaffi for pappa.

Ha ein god dag alle samen. Håpar sola smiler til dykk også. Det er alltid verdt å nyte!

Har du ferietips?

2010-02-08T00:08:00.004+01:00

Ferieplanlegging er eg dårleg på...

Kor kan ein familie med tre små barn dra
- når dei ikkje vil ha overfylt sydenferie, men gjerne varme
- når landet skal ha vestleg standard pga små barn, og samstundes vere framkommeleg med vogn
- når det bør vere noko kjekt for barn
- når det også bør vere kjekt for dei vaksne
- når det ikkje må vere for hektisk, men heller ikkje for roleg
- når reisetidspunktet er på varmaste sommaren
- når prisnivået må vere moderat
- når det bør vere kulturelle innslag
- når det ikkje skal vere Danmark eller Sverige

Eg tenkjer og tenkjer...

Dubrovnik, Paris, Portugal, Amsterdam, London, Island...

Har du eit tips?

Pakke frå Borghild

2010-02-04T21:02:00.006+01:00

I dag mottok eg ein herleg pakke frå godaste Borghild med bloggen Borghildpia. Ho syr så mykje fint og er kreativ som berre det. Eg tek av meg hatten for deg, Borghild.

Denne lekre pakka låg altså i postkassa mi, og det seiv skikkeleg lavendelduft ut fra han.
Og oppi pakka låg to bleieposar som eg har bestilt. Eg har kjøpt bleiepose av henne før óg, og er kjempenøgd med den.

Den eine posen hadde dette herlege retrostoffet.

Den andre dette lekre stoffet her.

Og her kan de sjå lavendelposen med eige Borghildstempel på.

Eg skal ikkje bruke desse posane til bleier denne gongen. Eg har ein til det formålet allereie. Desse posane har eg tenkt å ha til litt av kvart på badet mitt, både heime og i hyttehuset. Dei er nemleg praktiske til så mangt, og så så dekorative.

Du vil ikkje angre deg om du investerar i ein... ;-)

Dynetrekkmannen i aksjon igjen

2010-02-04T13:45:00.004+01:00

Dynetrekkmannen min har vore i aksjon igjen.

Dette biletet frå Fretexbutikken fekk eg på mail, og saken var klar!

Herleg!